Iniciativa pol Asturianu collabora con Musa Cafeína y Litografía Viña na convocatoria del II Concursu de Microrrellatos y Micropoemes col envís d’afalar la creatividá lliteraria. Y que nesta ocasión va incluyir al asturianu, pudiendo presentase testos na nuesa llingua, na convocatoria y na imaxe y bases del certame. El concursu tien abiertu'l plazu d'entrega d'orixinales hasta'l 15 de xunu de 2014 a les 24:00 hores.
Iniciativa pol Asturianu nes ondes emite un nuevu programa na so rede d'emisores per Asturies. Nesta ocasión el convidáu que mos atiende ye Victor Borja González, encargáu d'iguar el blogue de recién creación "Asturianu pa toos" (http://asturianupatoos.blogspot.com.es)
Esti vienres 11 de mayu, Día de les Lletres Asturianes, más de 2.000 persones percorrieron la cai Uría d'Uviéu hasta'l Teatru Campoamor con un lema claru "Oficialidá pa la llingua asturiana". Iniciativa pol Asturianu participó como cada añu con pancarta y nesta ocasión con unos reivindicativos xiblatos, pa meter ruiu pol oficialidá.
Iniciativa pol Asturianu, el Conceyu Universitariu pol Asturianu (CUPA) y l’Academia de la Llingua Asturiana (ALLA) entamen la que ye la cuarta edición de los Cursos d’Asturianu en Xixón esti martes 13 de mayu dende les 15 hores y hasta les 21, nel Conseyu de la Mocedá de Xixón (Avenida Manuel Llaneza 68, baxu).
Por mor de la Selmana de les Lletres Asturianes un nuevu programa d'Iniciativa pol Asturianu nes ondes afonda na situación del asturianu con Carlos Pulgar, voceru de la Xunta pola Defensa de la Llingua Asturiana (XDLA), organización que vien trabayando dende 1984 na defensa del nuesu idioma.
Militantes d'Iniciativa pol Asturianu van facer un repartu de folletos informativos na Plaza La Escandalera d'Uviéu esti vienres 9 de mayu con motivu del Día de les Lletres. A les 7 la tarde va celebrase la Manifestación pola Oficilidá na que la organización va participar tamién cola so pancarta.
Esti vienres 9 de mayu la sociedá asturiana vuelve a salir a la cai por mor del Día de les Lletres Asturianes pa reclamar la oficialidá del asturianu. Dende Iniciativa pol Asturianu volvemos a sofitar un añu más esta manifestación, participando de la marcha y unes hores enantes, dende les cinco la tarde, con un repartu informativu na Plaza la Escandalera, pa dar a conocer l'asociación y la situación del asturianu.
Coincidiendo col Día del Llibru y la Selmana de les Lletres Asturianes, a lo llargo de los próximos trenta díes, facese sociu d'Iniciativa pol Asturianu tien premiu. Dende 20 euros al añu puedes llevate un llote de revistes Formientu valoráu en 45 euros. Pero amás, queremos enllenar los institutos d'Asturies de lliteratura na nuesa llingua, cada nuevu sociu podrá decidir a qué centru unviamos otru llote completu de la revista Formientu.
Yá pue sentise un nuevu programa d'Iniciativa pol Asturianu nes ondes, amás de na cadena d'emisores a lo llargo de toa Asturies, na nuesa canal n'Ivoox, onde puedes descargar el podcast. Nesta ocasión facemos el nuesu programa radio dende l'IES Universidá Llaboral de Xixón.
Iniciativa pol Asturianu, en collaboración col Conceyu Universitariu pol Asturianu (CUPA) abre’l plazu p’apuntase a la cuarta edición de los Cursos d’Asturianu en Xixón, una esperiencia formativa qu’entama en collaboración cola Academia de la Llingua Asturiana y el Conseyu de Mocedá de Xixón. Los cursos que se van facer na sede del Conseyu de la Mocedá de Xixón (Avda. Manuel Llaneza, 68), van entamar a partir del 12 de mayu, cuntando con 36 hores llectives cada nivel.