La Xira pola Oficialidá ye una movilización cívica qu’entamen de forma conxunta d’Iniciativa pol Asturianu y la Fundación Almastur. Dambes organizaciones roblaron en febreru de 2023 un conveniu de collaboración pa trabayar conxuntamente n’actividaes rellacionaes cola llingua y la cultura asturiana, que se concretó n’abril col entamu de la xira. Trátase d’una actividá itinerante que naz col enfotu de percorrer los 78 conceyos asturianos y otros territorios d’España pa involucrar a tola ciudadanía y a les organizaciones con sensibilidá llingüística pa defender el drechu a la oficialidá.
La intención de la Xira pola Oficialidá ye organizar una selmana d’actividaes en cada conceyu con una esposición de bibliografía del idioma qu’incluya testos normativos y una muestra representativa de la lliteratura de la llingua, amás de charres, proyecciones y diferentes actos reivindicativos. La primer parada de la Xira pola Oficialidá foi’l conceyu Bimenes, por ser ésti un conceyu hestóricu na defensa del idioma, y continuó depués con actividaes nos conceyos de Samartín del Rei Aurelio y Villaviciosa.
Iniciativa pol Asturianu y la Fundación Almastur quieren agradecer la collaboración de los conceyos, centros educativos, asociaciones culturales, entidaes xuveniles y al movimientu vecinal que participaron hasta agora nes paraes yá programaes.
