El conceyu de Samartín del Rei Aurelio va acoyer la segunda parada de la Xira pola Oficialidá. Esta iniciativa, frutu d’un conveniu de collaboración ente la Fundación Almastur y Iniciativa pol Asturianu, quier concienciar a la sociedá sobre la necesidá del reconocimientu d’oficialidá de les llingües d’Asturies.
La Xira pola Oficialidá en Samartín del Rei Aurelio va entamar el llunes 16 d’ochobre a les 19:00 hores na Casa de la Xuventú de Sotrondio cola inauguración de la esposición ‘Voces, una hestoria de la llingua asturiana’ y la presentación de la campaña. Esti actu va cuntar cola presencia del alcalde del conceyu, José Ramón Martín Ardines. A continuación, a les 19:30 hores va proyectase’l documental ‘De güeles a nietes’, una producción d’Iniciativa pol Asturianu y Cuatro Gotes qu’afonda sobre la tresmisión xeneracional del asturianu.
Al día siguiente, el martes 17 d’ochobre, va tener llugar un alcuentru de los primeros docentes de l’asignatura de Llingua Asturiana y Lliteratura nes escueles. Esti actu pretende ser una reconocimientu al trabayu de los primeros maestros de l’asignatura.
El miércoles 18 d’ochobre a les 19:30 hores na biblioteca de L’Entregu va tener llugar la charra-coloquiu ‘Toponimia de Samartín del Rei Aurelio. Lo que mos diz el nome de lo pueblos’ por Ramón d’Andrés, profesor de la Universidá d’Uviéu. El filólogu va desplicar l’orixe de los diferentes nomes de los pueblos del conceyu.
El xueves 19 d’ochobre, a les 19:30 hores, va celebrase la charra-coloquiu ‘¿Por qué sí a la oficialidá del asturianu?’ a cargu d’Alma Hidalgo, vocal de mocedá y voluntariáu d’Iniciativa pol Asturianu. Esti actu va facese na Casa de la Xuventú de Sotrondio.
La Xira pola Oficialidá va rematar la so presencia en Samartín del Rei Aurelio el vienres 20 d’ochobre na Casa de la Xuventú de Sotrondio a les 19:30 hores con un actu reivindicativu que va entamar con una apertura musical con miembros de la Banda de Gaites de Samartín del Rei Aurelio, un recital poéticu y la llectura del manifiestu pola oficialidá. L’esctritor y músicu de L’Entregu, Xulio Arbesú, va faer un pieslle musical d’estes xornaes en defensa del idioma.
Iniciativa pol Asturianu y la Fundación Almastur agradecen al Conceyu de Samartín del Rei Aurelio, a la biblioteca de L’Entregu y a la Oficina de la Mocedá la collaboración pa sacar alantre esti programa.
