El presidente d’Iniciativa pol Asturianu, Iván Llera, aconceyó esti martes n’Uviéu cola viceconseyera de Cultura, Política Llingüística y Deportes, Ana Vanesa Gutiérrez. L’alcuentru, el primeru dende’l nomamientu de Gutiérrez como responsable d’esta área, desenvolvióse nun ambiente candial. El presidente de la organización de reivindicación llingüística aprovechó p’aportar delles propuestes pa desendolcar dende l’alministración autonómica a lo llargo d’esta llexislatura. Nesi sen, Llera insistió na necesidá de dotase d’un Plan de Normalización Llingüística como una ferramienta pa organizar, ordenar y facer siguimientu d’estes polítiques. Amás, el representante de la entidá propunxo la reformulación del Conseyu Asesor de Política Llingüística pa convertilu nun órganu de participación menos burocráticu que garantice la presencia de les entidaes y colectivos que trabayen na defensa del patrimoniu llingüísticu.
El presidente de la entidá tamién fizo aportaciones nel ámbitu de la alministración pública como la puesta a disposición de la ciudadanía formularios n’asturianu y eonaviego y la rotulación billingüe d’edificios, espacios y vehículos. Tamién la puesta en marcha d’un plan de sensibilización y formación del funcionariáu con ventayes llaborales pol deprendimientu o ameyoramientu del nivel llingüísticu, que permita l’aplicación efectiva de la llexislación nesta materia y la valoración del conocimientu d’asturianu como méritu n’oposiciones y procesos de selección de personal.
Iniciativa pol Asturianu incidió de manera especial na importancia de les meyores pal idioma na educación. L’asociación, al traviés del so presidente, apuntó la necesidá de garantizar la ufierta de les asignatures de Llingua Asturiana y Eonaviego en toles etapes educatives y en tolos centros asegurando la so voluntariedá ensin competir con otres optatives. Tamién s’incidió na reformulación de la campaña de matriculación nes asignatures de Llingua Asturiana y Eonaviego pa facela realmente efectiva asina como la renovación progresiva de los cartelos de los centros educativos pa que’l paisaxe llingüísticu de los centros tea tamién n’asturianu. Pa garantizar l’enseñu de la materia de Llingua Asturiana y Lliteratura, la entidá reclamó’l reconocimientu de la especialidá docente d’asturianu y l’ampliación de places del máster del profesoráu d’Educación Secundaria. Nel casu de l’acreitación del conocimientu d’asturianu, Llera plantegó la posibilidá de dar accesu a la certificación equivalente al B2 d’asturianu al alumnáu que curse l’asignatura en tola etapa educativa.
La organización tamién insistió na importancia de los medios de comunicación de titularidá pública nes polítiques de normalización llingüística y la tresmisión xeneracional. Llera destacó la necesidá de desendolcar el mandatu-marcu, documentu qu’acumula cuasi una década d’atrasu y qu’habría recoyer el mandatu de la RTPA de normalizar les llingües propies y fixar un incrementu progresivu y ambiciosu de los conteníos nestes llingües. Nesi sen, la organización propunxo como midíes más inmediates a curtiu y mediu plazu la conversión de RPA nuna emisora 100% n’asturianu y eonaviego y la ellaboración d’un manual d’estilu qu’estableza l’usu de la toponimia tradicional de forma prioritaria tanto na espresión oral como per escrito en tolos programes y soportes de RTPA.
Sobre la Universidá d’Uviéu, la organización plantegó la creación d’un Grau de Filoloxía Asturiana, l’establecimientu d’ayudes y premios a la realización de TFG, TFM y tesis n’asturianu y la creación d’un programa de formación del profesoráu. Asinamesmo, plantegó la potenciación del Día de les Ciencies Asturianes col asturianu como llingua vehicular. Pa rematar, aprovechando les competencies d’esta viceconseyería, Iniciativa pol Asturianu propunxo un esfuerciu y un apartáu de normalización específicu pa deportes pola visibilidá que tien na sociedá.
