Iniciativa pol Asturianu valora la decisión de la mesa del Congresu pa permitir l’usu del asturianu y l’aragonés na Cámara Baxa, pero considera una discriminación que los diputaos que lo faigan tengan que dividir el tiempu d’intervención p’autotraducise. La entidá recuerda que ye la propia Constitución Española la que reconoz la pluralidá llingüística del Estáu y afala a respetar y protexer toles modalidaes llingüístiques d’España como patrimoniu cultural que son, independientemente de si son oficiales o non.
Ente esta situación, la organización considera que la única ferramienta que va poder garantizar la plena igualdá ente tola ciudadanía independientemente de la llingua qu’use ye la oficialidá. “Ensin una reforma del Estatutu d’Autonomía que reconozca los drechos llingüísticos, los asturianos y les asturianes tamos condergaos a ser ciudadanos de segunda. La oficialidá ye la única vía pa llograr la plena igualdá de drechos de tola ciudadanía independientemente del idioma que caún quiera utilizar”, afirmó’l presidente d’Iniciativa pol Asturianu, Iván Llera.
Respeto al debate llingüísticu nes Cortes, el presidente de la entidá reconoció que ye “una bona noticia. “La visibilidá que puede tener l’idioma nesti foru tien un valir especial como elementu normalizador, pero ye importante recalcar qu’únicamente cola oficialidá s’atayaría de manera definitiva cualesquier tipu de discriminación por usar llibremente les nueses llingües”, concluyó.
Iniciativa pol Asturianu ye una asociación ensin ánimu d’arriquecimientu que nun recibe nenguna ayuda nin sovención pública. Llevamos más d’una década trabayando pola normalización social de les nueses llingües y pol reconocimientu de los drechos llingüísticos de los sos falantes.
