¿Quies denunciar un casu de discriminación llingüística? ¿Facer una consulta? ¿Felicitar a dalguien pol bon usu del asturianu? Iniciativa pol Asturianu pon en marcha’l Buzón del Asturianu. Esta ferramienta ye serviciu gratuitu abiertu a tola ciudadanía pa canalizar les quexes ante alministraciones, instituciones y empreses que vulneren los drechos llingüísticos de los falantes, asina como pa felicitar a quien da pasos alantre pa garantizar el nuesu drechu a vivir n’asturianu.
Col Buzón del Asturianu queremos asesorar y acompañar a les persones qu’atopen torgues pa desenvolver la so vida na llingua propia. Tamién reconocer a aquelles persones, empreses yá instituciones que, con procuru, son garantes del nuesu drechu a esprenos en tolos ámbitos na nuesa llingua. Cuando una persona escribe al buzón, revisamos el so casu pa estudiar cómo la podemos ayudar. Con toles denuncies, suxerencies, felicitaciones y consultes recibíes, Iniciativa pol Asturianu va ellaborar un informe añal, que va permitir facer siguimientu de cuáles son les problemátiques que más afecten a la ciudadanía.
Contacta col Buzón del Asturianu
Mapa de la discriminación llingüística
Entrugues frecuentes
¿Por qué un buzón del asturianu?
Davezu la ciudadanía nun conoz los sos drechos llingüísticos o nun sabe cómo reclamalos. Con esto serviciu queremos facilitar l’exerciciu d’esos drechos a tolos asturianos y asturianes.
¿Qué casos puedo comunicar?
Nesti espaciu vamos recoyer diferentes quexes y casos de discriminación como torgues pa presentar documentación n’asturianu, incumplimientos sobre toponimia o problemes pa matricular a la reciella na asignatura, pero tamién felicitaciones a un chigre qu’usa l’asturianu na carta, una empresa qu’etiqueta n’asturianu, un grupu de música que sacó nueves canciones utilizando les llingües propies.
¿Namás recoyéis quexes?
Non. Esti buzón naz cola voluntá d’avanzar nel exerciciu de los drechos llingüísticos de la ciudadanía recoyendo tamién suxerencies y felicitaciones, reconociendo a quien fai les coses bien.
¿Qué información tengo d’apurrir?
Namás necesitamos los tos datos personales y de contactu, amás d’una esplicación de la situación que quies poner nel nuesu conocimientu. Al traviés del formulariu d’esta páxina tamién vas poder apurrinos archivos axuntos pa complementar la información.
Nun quiero dar el mio nome y apellíos, ¿pasa dalgo?
El Buzón del Asturianu nun almite denuncies anónimes, pero nun tienes de qué preocupate: comprometémonos a protexer el to anonimatu.
¿Quién pue escribir al Buzón del Asturianu?
Cualesquier ciudadanu o ciudadana que quiera dar avisu d’una situación de discrminación llingüística.
Nun toi asociáu a Iniciativa pol Asturianu. ¿Tengo qu'asociame?
Non. El Buzón del Asturianu ye un serviciu gratuitu qu’Iniciativa pol Asturianu pon a disposición de la ciudadanía pa exercer los sos drechos llingüísticos. Nun ye necesario ser sociu o socia, pero siéndolo ayúdesnos a llegar a más sitios. Puedes asociate dende 20 euros al añu.