L’Asociación Cultural Faceira ya Iniciativa pol Asturianu presenten la campaña conxunta #FalamosIgual. Esta, espublizada nes redes sociales pa da-y visibilidá a la realidá llingüística común, quier dar a conocer qu’en Llión, Asturies y otros territorios, compártese una llingua tradicional común que recibe nomes distintos pero que formen el mesmu idioma. Les asociaciones quieren poner en valir esi patrimoniu llingüísticu común desplicando a la sociedá cómo les distintas variedaes del asturllionés (asturianu, n’Asturies, y llionés en Llión) son perfectamente intelixibles ente si, compartiendo gran parte del léxicu y una mesma gramática, asina como una hestoria común.

Otru obxetivu de la campaña #FalamosIgual ye reconocer les variedaes internes de la llingua como un elementu positivu, que nun contradiz la unidá del mesmu, sinón que ye una riqueza. Asina, falar de llionés o asturianu ye falar de la mesma realidá llingüística con nomes distintos y con rasgos propios, como asocede con toles llingües del mundu, que tan conformaes por distintes variedaes.

La campaña llevóse allantre nes redes sociales con una pallabra común a tol dominiu llingüísticu y una imaxe ilustrativa, con un diseñu atractivu, cada semana, de forma asemeyada a otres campañes entamaes poles entidaes de forma independiente. Les organizaciones animen a la comunidá de falantes a compartir estes imáxenes, buscando que lleguen al máximu númberu posible de persones. #FalamaosIgual inclúi tamién una llamáu a les instituciones, pa que trabayen de forma conxunta en reforciar los llazos culturales y lingüísticos d’Asturies, Llión y el restu de territorios que comparten llingua, con campañes propies, eventos y apoyu recíprocu a iniciatives culturales, nel ámbitu musical, lliterariu, o de la cultura tradicional.