La organización aconceyó güei con Ángela Vallina, vocera parllamentaria, y con Víctor Suárez, responsable de política llingüística na dirección del partíu
Los representantes d’Iniciativa pol Asturianu insistieron muncho na importancia de que l’asturianu tenga una presencia fuerte nos conceyos onde gobierna la coalición
Iniciativa pol Asturianu tamién invitó al partíu a siguir trabayando nes instituciones pa consiguir la oficialidá
UVIÉU, 20/07/2020. Iván Llera, presidente d’Iniciativa pol Asturianu, ya Inaciu Galán, vocal de rellaciones institucionales de la entidá, aconceyaron güei telemáticamente con Ángela Vallina, vocera parllamentaria d’Izquierda Xunida y con Víctor Suárez, responsable de política llingüística na dirección del partíu. Dientro del alcuentru los representantes d’Iniciativa pol Asturianu treslladaron la importancia de siguir trabayando nel usu y na presencia de la toponimia tradicional y del asturianu. Dende Iniciativa pol Asturianu recordaron que “varios conceyos nos que gobierna Izquierda Xunida son un exemplu nel usu del asturianu, pero tenemos que siguir dando pasos allantre. Izquierda Xunida tien un pesu importante na política municipal y esa presencia tien que ser bona pal idioma”.
Iván Llera propunxo delles midíes concretes pa trabayar dende la Xunta Xeneral pa que l’idioma gane espacios na RTPA, y conseguir una presencia del asturianu nos informativos, incidiendo especialmente na cuestión del usu oral preferencial de los topónimos tradicionales oficializaos.
Galán comentó nel conceyu que ye importante siguir dando pasos nel trabayu diariu del partíu nes instituciones pa consiguir la oficialidá. El vocal de rellaciones institucionales dixo que “va unos díes treslladábemos a la FSA-PSOE qu’a día de güei danse les circunstancies pa entamar a trabayar na reforma estatutaria, y güei pidimos a Izquierda Xunida siguir trabayando nesi sentíu”.
Llera dixo que “ye’l primer conceyu que tenemos con unos representantes d’un grupu parllamentariu dempués de l’aprobación del Reglamentu del usu del asturianu na Xunta Xeneral y queremos treslladar la norabona por esi pasu y animamos a facer normal l’usu del asturianu pa cualesquier intervención na Cámara”.
