Iniciativa pol Asturianu entama añalmente cursos d’asturianu y cursos en xeneral impartíos col asturianu como llingua vehicular. Amás, ufrimos la posibilidá d’organizar cursos y talleres a midida pa otres entidaes y alministraciones. Cuntamos con una plataforma d’enseñu na rede empobinada al alumnáu que sigue los cursos en llinia. Un preséu que permite siguir los cursos dende cualquier llugar del mundu.
Los cursos d’asturianu, organizaos en collaboración cola Academia de la Llingua Asturiana, ufiértense baxo la modalidá a distancia. Hai dos niveles: el nivel I ta empobináu a persones ensin conocimientos d’asturianu, mientres que’l nivel II ta dirixíu a persones con una conocencia más fonda del idioma que yá ficieren dalgún cursu enantes.
La convocatoria de los cursos d’asturianu online ábrese tres veces al añu, nos periodos seronda, iviernu y primavera. Los cursos tienen una duración de 50 hores llectives y una duración aprosimao de tres meses. Esi total d’hores del cursu se van repartir de la siguiente manera: 25 hores de tutoríes a distancia -de manera obligatoria-, otres 20 de trabayu autónomu y 5 hores complementaries que va proponer el tutor/tutora.
Al final de la formación va facese una prueba. El preciu de la inscripción ye de 75 euros y inclúi tolos materiales necesarios pa llevar alantre’l cursu. Los socios d’Iniciativa pol Asturianu benefíciense d’un descuentu del 20% nel preciu del cursu. Si tovía nun formes parte d’Iniciativa pol Asturianu, pues asociate al traviés d’esti formulariu.
Calendariu de los próximos cursos d’asturianu:
Primavera
Matrícula: del 14 d’abril al 23 d’abril de 2025
Cursu: del 28 d’abril al 11 de xunetu (11 selmanes)
Pa más información sobre la nuestra ufierta de cursos d’asturianu presenciales y a distincia, pues contactar con nós per corréu lletrónicu y nel teléfonu 675 977 751.