Iniciativa pol Asturianu y la Fundación Almastur entamen mañana la ‘Xira pola Oficialidá’ en Bimenes. El conceyu yerbatu va ser el primer puntu p’arrancar esta campaña informativa sobre les llingües d’Asturies que pretende concienciar sobre la necesidá del reconocimientu d’oficialidá de les mesmes nel Estatutu d’Autonomía.
Les organizaciones presenten un variáu programa d’actividaes que van a entamar el llunes 24 d’abril a les 19:00 hores cola inauguración institucional de la esposición sobre la hestoria de la llingua asturiana. Darréu, va proyectase’l documental recientemente estrenáu nel III Seminariu ‘Oficialidá, el camín constitucional de futuru pal asturianu’ qu’entamó Iniciativa pol Asturianu esta fin de selmana n’Uviéu.
Les actividaes van siguir el martes, 25 d’abril a les 19:30 hores cola charra-coloquiu ‘¿Por qué sí a la oficialidá del asturianu?’ que va dar Inaciu Galán, vocal d’Iniciativa pol Asturianu, pa desplicar en qué consiste la oficialidá y qué implicaciones va tener.
El xueves 27 d’abril a les 19:30 hores, el filólogu y profesor de la Universidá d’Uviéu Ramón d’Andrés va afondar na toponimia del concejo cola charra-coloquiu ‘Toponimia de Bimenes. Lo que mos diz el nome de lo pueblos’.
La ‘Xira pola Oficialidá’ va rematar la so presencia nel conceyu de Bimenes el vienres 28 d’abril a les 19:30 hores con una apertura musical a cargu de la cantante de tonada Mariluz Cristóbal Caunedo. Depués de la so actuación, el Conceyu de Bimenes va entamar un actu de reconocimientu XXV Concursu de Cuentos pola Oficialidá del Asturianu. P’acabar l’actu, Iniciativa pol Asturianu y la Fundación Almastur van faer llectura del manifiestu pola oficialidá.
