El rector de la Universidá va inaugurar el simposiu que va afondar nos modelos de normalización y la tresmisión xeneracional

Nesta tercer edición van participar responsables de la política llingüística de la Comunidá Valenciana, Galicia y País Vascu

Iniciativa pol Asturianu presentó esta mañana n’Uviéu’l III Seminariu ‘Oficialidá, el camín constitucional de futuru pal asturianu’, que se va centrar n’afondar nos modelos de normalización y la tresmisión xeneracional. El rector de la Universidá d’Uviéu, Ignacio Villaverde, va ser l’encargáu d’inaugurar el simposiu, que se va desendolcar el vienres 21 y sábadu 22 d’abril nel Aula Magna del Edificiu Hestóricu.

Nesta tercer edición del seminariu van desarrollase diferentes ponencies y alderiques pa conocer la situación del idioma y les opciones d’oficialidá. L’alcuentru va entamar el vienres a les 16:45 hores con una ponencia del abogáu Nicolás Bartolomé baxo’l título ‘Los modelos d’oficialidá de les llingües d’España. Opciones pal consensu constitucional’.

Esa primera xornada va tar dedicada a conocer les esperencies d’otros territorios y afondar nos modelos d’oficialidá de País Vascu, Comunidá Valenciana y Galicia. Pa ello, van tar presentes responsables de la política llingüística d’estos territorios. Miren Dobaran, viceconseyera de Política Llingüística del Gobiernu del País Vascu; Rubén Trenzano, Director Xeneral de Política Llingüística y Xestión del Multillingüismu de la Comunidá Valenciana; y Valentín García, Secretariu Xeneral de Política Llingüística de la Xunta de Galicia que van aportar una visión de cada procesu d’oficialidá nel so territoriu.

El sábadu la sesión va arrancar cola esposición del investigador David Guardado que va reflexonar sobre la visión del asturianu a lo llargo de la historia. De siguío, Fernando Padilla, maestru, pedagogu y ex Director Xeneral de Planificación y Normalización Llingüística d’Asturies va presentar un repás a la situación de la llingua asturiana na escuela depués de 40 años d’escolarización na asignatura.

Nesta segunda xornada va tener llugar l’estrenu d’un nuevu documental que lleva’l títulu de ‘De güeles a nietes. El retu de la tresmisión xeneracional del asturianu’. Un documentu audiovisual qu’afonda na importancia de la herencia llingüística y la tresmisión del idioma.

Les actividaes de la mañana van siguir con una mesa de diálogu con Xosé Antón González Riaño, caderalgu de la Universidá d’Uviéu y Presidente de l’Academia de la Llingua Asturiana y la periodista Pilar Rubiera titulada ‘¿Cómo sedría una Asturies con oficialidá?’. La mañana va finar col alderique ‘Conociendo los programes electorales. Modelos d’oficialidá y normalización’ con representantes de partíos políticos que lleven la oficialidá nel programa.

La recta final del III seminariu, na tarde del sábadu, va entamar cola presentación del Colectivu Manuel Fernández de Castro, siguiendo con una presentación de diferentes empreses y negocios qu’usen l’asturianu na so actividá comercial. Enantes de pesllar cola llectura del manifiestu, la organización va presentar una mesa redonda baxo’l títulu ‘¿Cómo ye, bro? Nueves perspectives na normalización del asturianu’ na que van participar Xicu Ariza, musicasturiana.com; Blanca Fernández, escritora y cosplayer; Lluci Miravalles, diseñadora de moda y Félix Fernández, Acuto Xuegos. La finalidá d’esta mesa ye afondar en cómo averáse a les nueves xeneraciones na tresmisión xeneracional de la llingua asturiana.