El Conceyu de Xixón ta instalando la nueva cartelería informativa del serviciu d’alquiler de bicicletes eléctriques. Los testos de los paneles, que recueyen la información del serviciu, tan disponibles en tres llingües (inglés, castellán y asturianu) pero en diferente estilu y formatu.
Demientes que’l castellán y l’inglés comparten tipografía, l’asturianu apaez más pequeñu, en contraposición col inglés o castellán que si tan nel mesmu formatuy tamañu.
Por mor d’ello, Iniciativa pol Asturianu presentó un escritu al Conceyu de Xixón denunciando esti tratamientu indignu pa la llingua asturiana na cartelería del serviciu d’alquiler de bicicletes. Pa la organización de reivindicación llingüística, el trabayu de normalización del idioma tien que pasar por llograr espacios pa visibilizar l’asturianu n’igualdá de condiciones y niveles qu’otros idiomes (nesti casu l’inglés y el castellán).
La ONG reclama al Conceyu el cambéu de la señalética pa que l’asturianu tea presente al mesmu nivel que los otros dos idiomes y d’una manera igualitaria y proporcionada.
