Iniciativa pol Asturianu abrió esti llunes el plazu de matriculación p’apuntase al nuevu cursu de llingua asturiana (nivel básicu 1) que va facese a distancia, al traviés d’una plataforma dixital. La formación va tener una duración de 36 hores llectives y va entamar el llunes 29 d’abril y va acabar el 12 de xunetu. La modalidá a distancia favorez la autoorganización del alumnáu y permite-yos dir faciendo les actividaes según l’horariu de caún, de manera mas conveniente.
El nivel inicial que s’ufierta ta empobináu a persones ensin formación d’asturianu o con nivel baxu de conocencia. Los estudiantes que lu superen van algamar una acreitación de l’Academia de la Llingua Asturiana.
El preciu de la matrícula ye de 60 euros. Les persones asociaes a Iniciativa pol Asturianu van beneficiase d’un descuentu y solo tienen qu’abonar 50 euros. Toles persones interesaes pueden asociase nel momentu de la matrícula y disfrutar d’esti descuentu. Les inscripciones pal cursu pueden cubrise nun formulariu na propia páxina web d’Iniciativa pol Asturianu, onde tamién s’alcuentren toles condiciones pal mesmu. El plazu d’inscripción acaba’l 28 d’abril.
