El II Congresu Internacional de la Llingua Asturiana va celebrase ente los díes 22 y 23 de mayu d’esti añu en Madrid. La Facultá de Filosofía y Lletres de la Universidá Autónoma de Madrid va a acoyer esti simposiu d’analís y estudio que pretende afondar nel conocimientu del idioma y de la importancia de la declaración de la oficialidá pal so futuru.
L’alcuentru, nel que collaboren Iniciativa pol Asturianu y l’Academia de la Llingua Asturiana, ta coordináu por Avelino Corral, profesor na Universidá Autónoma de Madrid. El congresu pretende faer un analís de la situación actual del idioma al traviés de diferentes ponencies y comunicaciones de representantes de les universidaes d’Uviéu, Ștefan cel Mare (Suceava), Vigo, Oklahoma State, California Riverside, Sussex, The City University of New York, Granada y Burgos.
Iniciativa pol Asturianu, entidá coorganizadora del congresu, pretende qu’esti seya un espaciu pal alcuentru científicu acerca de la realidá social qu’arrodia a la llingua asturiana y se convierta nuna manera de siguir sumando perfiles del ámbitu universitariu al trabayu pol idioma, asina como facer llegar esa realidá a instituciones universitaries de tol mundu.
La organización de reivindicación llingüística agradez al profesor Avelino Corral, a la Universidá Autónoma de Madrid y a toles persones collaboradores el so esfuerciu y trabayu pa sacar alantre esti alcuentru.
