Teno Prau, Ayalgueru d'Iniciativa pol Asturianu, foi l'encargáu de dicir unes pallabres en representación de la organización dientro del actu de pieslle de los V Cursos d'Asturianu en Xixón. Ufrimos agora'l so dicursu completu:
Estimaos Vicepresidente de l’Academia de la Llingua Asturiana, presidente d’Iniciativa pol Asturianu, alumnos, collacios y collacies toos:
En primer llugar quiero davos la bienllegada a esti actu de pieslle y entrega de diplomes de los V Cursos d’Asturianu en Xixón, que facemos porque seya un momentu pa reconocer al alumnáu l’esfuerciu, agora recompensáu colos diplomes que güei vos entregamos.
Dende marzu de 2011, el CUPA ya Iniciativa pol Asturianu entamaben en collaboración cola Academia de la Llingua Asturiana estos cursos d’asturianu en Xixón. Pesllamos agora la quinta edición con más de 200 alumnos que pasaron yá peles aules, presenciales y virtuales, pa formase nel usu del nuesu idioma. Nun podemos tar más satisfechos del resultáu.
Dende Iniciativa pol Asturianu queremos animavos a qu’estos cursos seyan un pasu más na vuesa rellación cola llingua asturiana. Necesitamos cuntar con vosotros, porque la llingua que deprendéis nestos cursos, fuera de les aules d’esti Conseyu, vive, como sabéis, una situación que nun ye la que más mos prestaría. Y como ciudadanos y ciudadanes d’Asturies, ye responsabilidá de nueso trabayar pa que’l patrimoniu que mos entregaron los nuesos güelos, llegue a les próximes xeneraciones conserváu y si ye posibile, en meyores condiciones tovía.
La llingua asturiana ta nun momentu clave. Les decisiones que se tomen nos vinientes años van marcar si esti idioma tien futuru o non. Tocarános siguir trabayando pa evitar los pasos atrás, pa consiguir más avanves pal idioma. Y vosotros, col usu diariu, en tolos ámbitos, con toles persones, podéis facer muncho. Porque una llingua que ta viva nel día a día d’una sociedá, nun desapaez por muncho que dalgunos poderes faigan tolos posibles por valtala. Cuntamos con vós pa que seyáis guía pa munchos asturianu, exemplu de compromisu y llealtá con esti idioma nuesu tan maltratáu.
Por supuestu, animámosvos a sumavos al llabor d’Iniciativa pol Asturianu. La vuesa aportación, más allá de lo económico, ye importante pa ser fuerte énte les alministraciones públiques y consiguir que se dean más pasos alantre hasta algamar la necesaria, la imprescindible oficialidá. La única manera de garantizar los drechos llingüísticos de los asturianos y les asturianes.
Con toles ganes, pol sofitu de la sociedá a esta iniciativa, trabayamos yá na preparación de los que sedrán, los VI Cursos d’Asturianu en Xixón, pa xineru, nos qu’esperamos poder presentar novedaes, aguardando cuntar con vosotros y que tamién otres persones se sumen a esta esperiencia.
Nun puedo acabar ensin davos la norabona pol llabor.
Munches gracies y ¡Puxa Asturies!
