El pasáu 10 d'avientu pesllábense los V Cursos d'Asturianu en Xixón nun actu presidíu por Xosé Antón González Riaño, vicepresidente de l'Academia de la Llingua Asturiana. Nel actu intervinieron tamién, amás de los alumnos, Inaciu Galán, presidente d'Iniciativa pol Asturianu, y Sabel Tuñón y Teno Prau, vocal de Voluntariáu y ayalgueru, respectivamente. 

Los cursos, puestos en marcha por Iniciativa pol Asturianu en collaboración cola Academia de la Llingua Asturiana y el Conceyu Universitariu pol Asturianu nel Conseyu de la Mocedá de Xixón incluyeron dos itinerarios nesta ocasión, un nivel básicu y un nivel II, participando al rodiu de 50 alumnos ente’l sistema presencial y los alumnos que lu ficieron a distancia.  

Nesta ocasión y como ye vezu, cuntóse con alumnos de fuera d’Asturies, nel presencial, como un alumnu colombianu que lleva años viviendo n’Asturies y quixo averase al estudiu del asturianu. Esti alumnu foi unu de los que dio llectura a un testu cuntando la so esperiencia nel actu d’entrega de diplomes. Ufrimos agora estos testos, y nes próximes selmanes, un programa especial d'Alderiques d'Asturies grabáu na entrega de los diplomes y pieslle del actu, que remató con una espicha preparada pol alumnáu del cursu y un sortéu de productos culturales n'asturianu cortesía de la revista Formientu, Iniciativa pol Asturianu y la Algamar Producciones.

 

Dicursos del actu