El presidente d'Iniciativa pol Asturianu representó a la entidá na gala de pieslle de la 22 edición d'Abierto hasta el amanecer, programa d'ociu xuvenil qu'esti añu incluyó un concursu lliterariu nel que collaboró Iniciativa pol Asturianu. A lo llargo de la so intervención animó a la entidá xuvenil a promover l'usu del asturianu na so actividá.
La llingua asturiana vista dende la perspectiva d'una asturiana a la que-y toca vivir lloñe d'Asturies, en Castelló. Cristina Álvarez Villanueva participó esti añu nos IV Cursos d'Asturianu en Xixón, a distancia, y estes son les sos reflexones, qu'agora compartimos.
L'académica de númberu, Marta Mori d'Arriba, el presidente d'Iniciativa pol Asturianu, Inaciu Galán, y un representante del Conceyu Universitariu pol Asturianu, van pesllar oficialmente’l programa d’actividaes de los IV Cursos d'Asturianu en Xixón, entamaos por Iniciativa pol Asturianu, el Conceyu Universitariu pol Asturianu y l'Academia de la Llingua Asturiana. L’actu sedrá a les 19:00 hores, nel Salón d'Actos del Conseyu la Mocedá de Xixón (Avda. Manuel Llaneza, 68)
Iniciativa pol Asturianu ufre una nueva entrega del so boletín informativu dixital, el númberu doble 30-31, qu'inclúi les noticies sobre l'actividá de la organización nos meses de mayu y xunu.
Iniciativa pol Asturianu, el Conceyu Universitariu pol Asturianu (CUPA) y l’Academia de la Llingua Asturiana (ALLA) van entregar los diplomes acreitativos de los IV Cursos d’Asturianu en Xixón esti xueves 26 de xunu a partir de les 19 hores, nel Salón d’Actos del Conseyu de la Mocedá de Xixón (Avenida Manuel Llanez 68, baxu), cola participación de los alumnos, que van dar llectura a dellos testos, l'académica de númberu y profesora de la Universidá d’Uviéu, Marta Mori d'Arriba, el presidente d'Iniciativa pol Asturianu y director de los Cursos, Inaciu Galán, y Javier Cubero, representante del CUPA.
Estos díes atrás pudimos ver como dende dalgunos sectores políticos y mediáticos tiraben a dar contra la presencia de la llingua asturiana nel sistema educativu. Les reformes que se tán faciendo cola nueva llexislación fueron la xida pa ximelgar l’árbol y ver si consiguíen que l’asturianu diera unos pasos atrás.
Esti vienres pasáu, el presidente d'Iniciativa pol Asturianu, Inaciu Galán, intervieno nel actu celebráu nel llar de l'Academia de la Llingua Asturiana, onde xunto a la presidenta de l'ALLA y delles entidaes espúnxose la postura d'éstes alredor de la LLOMCE, el currículu d’Asturies y la enseñanza de la Llingua Asturiana.
Güei nel nuesu programa afondamos con Inaciu Galán, Presidente d'Iniciativa pol Asturianu, na engarradiella que s'entamó coles consecuencies curriculares que va aportar l'aplicación de la nueva llei d'educación (LLOMCE) n'Asturies.
Esti vienres, 20 de xunu, a les 12 la mañana, el llar de l'Academia de la Llingua Asturiana, na cai L’Águila 10, d'Uviéu, Iniciativa pol Asturianu va participar nuna rueda de prensa na que va esponese la posición conxunta de delles entidaes y de l’Academia de la Llingua Asturiana alredor de la LLOMCE, el currículu d’Asturies y la enseñanza de la Llingua Asturiana.
El nuevu xefe d'estáu español faló nel so discursu de la convivencia de les tradiciones y les cultures diverses, qu'espresó "tiene su mejor expresión en el concierto de las lenguas", citando a autores en castellán, vascu, catalán y gallegu, pero non n'asturianu. Arriendes d'ello, al terminar la so intervención despidióse con un "munches gracies" en castellán, catalán, vascu y gallegu, pero non, n'asturianu.