L'académica de númberu, Marta Mori d'Arriba, el presidente d'Iniciativa pol Asturianu, Inaciu Galán, y un representante del Conceyu Universitariu pol Asturianu, van pesllar oficialmente’l programa d’actividaes de los IV Cursos d'Asturianu en Xixón, entamaos por Iniciativa pol Asturianu, el Conceyu Universitariu pol Asturianu y l'Academia de la Llingua Asturiana. L’actu sedrá a les 19:00 hores, nel Salón d'Actos del Conseyu la Mocedá de Xixón (Avda. Manuel Llaneza, 68)

 

Nos dos cursos de nivel básicu y nivel II participaron esti añu más de cuarenta persones, ente presencial y a distancia. A lo llargo del actu, entregaránse los diplomes y habrá intervenciones de dellos alumnos falando de la so esperiencia y de la so visión de la situación de la llingua asturiana, celebrando darréu un pinchéu nes mesmes instalaciones del Conseyu.

 

L'ésitu de la convocatoria garantiza qu'a la vuelta'l branu vuelva a convocase la que sedrá la quinta edición de los Cursos d'Asturianu en Xixón.