Esti llunes 11 de payares de 2013, a les 20 hores, nel Club de Prensa de La Nueva España en Xixón, asitiada nel Monte de Piedá de CaxAstur, xunto a la cai Institutu, va celebrase una presentación de la campaña d'usu del asturianu nes empreses d'Iniciativa pol Asturianu. Esta campaña trabaya pol fomentu del usu de la llingua asturiana n'empreses.
Iniciativa pol Asturianu inicia la so collaboración cola asociación Abierto Hasta el Amanecer cola so participación na organización del concursu lliterariu ¿Qué cuentes...? entamáu por esta entidá y nel qu'Iniciativa pol Asturianu collabora introduciendo l'asturianu na imaxe de la convocatoria, bases, etc. Dende la organización felicitamos a l'asociación xixonesa por animase col usu del asturianu nun ámbitu tan importante como'l de la mocedá, onde ye clave tresmitir l'asturianu a les xeneraciones vinientes.
Un mes más llega a los correos de tolos simpatizantes y socios d'Iniciativa pol Asturianu la información cola actividá más destacada de la organización. Si entá nun recibes el boletín informativu únvianos un corréu a contautu@s806295988.mialojamiento.es o soscríbite na páxina web de nueso.
La selmana pasada, Illán, el neñu del colexu Auseva al que la Conseyería d'Educación del Gobiernu d'Asturies negaba la posibilidá de dir a clases d'asturianu atopaba solución. El llamáu fechu pola familia, el propiu centru educativu ya Iniciativa pol Asturianu atrayía l'atención de la prensa y al dirixise dalgunos medios a la Conseyería, poques hores dempués del unviu de la nota de prensa, la Conseyería ufría a la familia una solución qu'anque nun ye satisfactoria del too, permite que'l neñu yá s'incorporare a les clases d'asturianu nel so centru.
Nel mes de febreru, el presidente d'Iniciativa pol Asturianu, Inaciu Galán, aconceyaba nel Congresu de los Diputaos, en Madrid, con representantes de los cuatro partíos que tienen miembros electos por Asturies. D'aquellos conceyos surdieron dalgunos compromisos, como foi la busca d'una partida nos Presupuestos Xenerales del Estáu pa l'Academia de la Llingua Asturiana (ALLA) Estos díes atrás, dempués de dalguna conversaciones coles formaciones confirmóse la presentanción d'enmiendes a los Presupuestos.
El pasáu sábadu 19 d'ochobre celebróse nel Auditoriu d'Uviéu'l Congresu de Cultura Asturiana Mozo, un conceyu de xente del ámbitu de la cultura de menos de 35 años. Iniciativa pol Asturianu collaboró coles sos aportaciones a la ponencia dedicada a organizaciones de reivindicación llingüística y difusión cultural, que coordina Inaciu Galán, presidente de la organización. Ufrimos agora la ponencia completa.
El miércoles 16, Iniciativa pol Asturianu tuvo presente na conferencia nomada “Radiodifusión en Llingües Minoritaries: Ónde Tamos, Ónde Debíemos Dir”, entamada pola Alianza Llibre Europea.
Esti sábadu 19 d'ochobre celébrase nel Auditoriu d'Uviéu'l Congresu de Cultura Asturiana Mozo, un conceyu de xente del ámbitu de la cultura de menos de 35 años. El Congresu tien como oxetivos proyectar a la sociedá asturiana la idea de que hai muncha xente creando y trabayando nel mundu de la cultura asturiana y facer visible esa realidá, que, n’últimu términu, xenera empléu y riqueza.
El 30 setiembre, Día Internacional de los Traductores, la seición de Rellaciones Internacionales d’Iniciativa pol Asturianu (IPA) tuvo noticia d’un proyeutu nomáu ‘Skype Mini’, una iniciativa entamada pa tornar les 234 pallabres básiques del software de comunicaciones (VoIP) Skype a tantes llingües como fuere posible. Una selmana dempués, el programa taba tornáu dafechu.
Tres l'anuncia de Los Verdes - Alianza Llibre Europea (EFA) d'una conferencia titulada "Radiodifusión en llingües minoritaries: ónde tamos, ónde tenemos de dir", Iniciativa pol Asturianu (IPA) quier anunciar que'l nuesu representante de Rellaciones Internacionales, Xosé B. Álvarez, va tar presente nel Parllamentu Européu p'asistir a la conferencia y presentar el programa de radio "Iniciativa pol Asturianu nes ondes" como un exemplu esitosu d'un proyectu basáu na radiodifusión nuna llingua minoritaria y en peligru.