Como si d’una máquina del tiempu se tratare volvemos a venos nes cais glayando “Bable nes escueles” como yá ficiera esti movimientu de reivindicación llingüística nos años setenta y ochenta. La llingua asturiana cuerre peligru nel espaciu principal pal so espardimientu pola mor de la nueva llei d’educación, la nomada Llei Wert.
Dende Iniciativa pol Asturianu reiteramos el nuestru maltar pol continuu incumplimientu por parte de los conceyos de los decretos de toponimia aprobaos. Nesti casu trátase del Conceyu de La Ribera, con decretu aprobáu de 2006, quien fixera cambeos na so web institucional tres denuncies a títulu individual del nuestru Vicepresidente Vítor Suárez, mesmo al Conceyu como a los grupos municipales.
Pequeños llogros d'estes selmanes atrás. Les páxines en Facebook de delles entidaes xixoneses yá usen la toponimia oficial o l'asturianu nel so nome, dempués de delles quexes.
Iniciativa pol Asturianu, el Conceyu Universitariu pol Asturianu (CUPA) y l’Academia de la Llingua Asturiana (ALLA) van entregar los diplomes acreitativos del III Cursu d’Asturianu en Xixón esti martes 4 de febreru a partir de les 19 hores, nel Salón d’Actos del Conseyu de la Mocedá de Xixón (Avenida Manuel Llanez 68, baxu), cola participación de los alumnos, que van dar llectura a dellos testos, tocar dalgunos instrumentos y hasta ver dalgunos vídeos d’alumnos que siguieron el cursu a distancia dende l’estranxeru. Nel actu van participar tamién, representantes de les asociaciones y Xosé Antón González Riaño, miembru de l’Academia, que va dar los diplomes a los más de trenta alumnos inscritos, ente presencial y a distancia.
Iniciativa pol Asturianu súmase esti xueves a la manifestación convocada polos sindicatos del enseñu contra la LOMCE, nomada Llei Wert. La organización amuesa la so postura contraria a esta llei que podría acabar cola presencia del asturianu nel sistema educativu.
Un añu más el Gobiernu d’Asturies entrega los sos Premios Lliterarios n’asturianu, los máximos gallardones institucionales del país, y fáilo ensin presencia institucional d’importancia. Dende Iniciativa pol Asturianu entrúguense “¿ónde ta’l Presidente Javier Fernández nun actu de la importancia d’estos Premios?”.
L'asturianu suel tar presente en dellos de los cartelos asoleyaos per estes feches p'anunciar la programación d'Antroxu nos conceyos. Sicasí, la mayoría de los mesmos preséntense en castellán o faen un usu mínimu del idioma propiu -llendáu namás al nome de la fiesta- mientres otra información como la fecha o los actos a celebrar vienen en castellán.
Iniciativa pol Asturianu asoleyó a entamos d'esti mes dos modelos de calendariu de mano pal 2013 que yá tán distribuyéndose per Asturies. Los calendarios, tán dedicaos a la campaña "El futuru del asturianu depende de TI" y al usu del asturianu nel ámbitu educativu.
Esti sábadu 2 de febreru dende les 17 hores, celebraráse n'Uviéu l'aconceyamientu de la Xunta Direutiva d'Iniciativa pol Asturianu. Nesta ocasión celebraráse nel Centru Social de Pumarín, nel númberu 1 de la cai de Turina, n'Uviéu.
Un mes más, Iniciativa pol Asturianu apurre información de la so actividá a socios y simpatizantes de la organización al traviés del so Boletín informativu dixital. Esti boletín ufre información completa de l'actividá de la organización a lo llargo del mes, asina como l'avance de dalgunes cuestiones futures. Puedes apuntate con namás introducir el to corréu nel estoyu al final d'esta páxina.