La selmana pasada, Illán, el neñu del colexu Auseva al que la Conseyería d'Educación del Gobiernu d'Asturies negaba la posibilidá de dir a clases d'asturianu atopaba solución. El llamáu fechu pola familia, el propiu centru educativu ya Iniciativa pol Asturianu atrayía l'atención de la prensa y al dirixise dalgunos medios a la Conseyería, poques hores dempués del unviu de la nota de prensa, la Conseyería ufría a la familia una solución qu'anque nun ye satisfactoria del too, permite que'l neñu yá s'incorporare  a les clases d'asturianu nel so centru.


Iniciativa pol Asturianu felicita a la familia pol so compromisu col asturianu y al Colexu Auseva d'Uviéu por adaptar los horarios pa consiguir qu'Illán tuviera clases d'asturianu nel menor tiempu posible. Sicasí, la Conseyería negóse a ufrir un profesor pal cursu d'Illán y ésti va tar na clas d'un cursu menos, anque col compromisu de cursar el temariu específicu del so cursu. Ye d'agradecer tamién el compromisu del profesor de llingua asturiana asignáu a esti centru cola formación d'esti rapaz, pa lo qu'ufrió toles facilidaes, dempués de que'l neñu perdiere un mes de clases d'asturianu.

El casu nun ye otro qu'una amuesa más del tratu llamentable que da Educación a la llingua asturiana nes escueles ya institutos d'Asturies. Dende Iniciativa pol Asturianu siguimos sollertes a estos casos y a buscar solución pa los mesmos. Entendemos que l'asignatura d'asturianu tien que cuntar con una situación digna, como una más del currículu y con un profesoráu que tenga unes condiciones dignes y non un estáu continuu d'interinidá, pa lo que solicitamos a la Conseyera d'Educación que cumpla cola so promesa de solucionar la reconocencia de la especialidá d'asturianu pa los docentes.

 

Entrevista cola madre n'Iniciativa pol Asturianu nes ondes