Un añu más, col entamu del cursu lleguen los problemes cola asignatura de llingua asturiana. La Conseyería d'Educación nun fizo los deberes y pasáu cuasi un mes de cursu hai colexos onde los neños nun tienen profesor d'asturianu.
Va más d'un añu la Conseyera d'Educación, Ana González Rodríguez, prometió que fadría les xestiones pa que los profesores d'asturianu vieran reconocida la especialidá y pudieran convocase oposiciones. La cuestión sigue ensin solucionase. Los profesores d'asturianu siguen en situación de precariedá dempués de cuasi trenta años d'asturianu nel sistema educativu.
Les families vense desprotexíes mientres el Gobiernu utiliza variaes técniques pa evitar que los neños estudien l'asignatura d'asturianu, evitando dala a conocer y nun la promocionando, dirixendo a los alumnos a otres asignatures, poniéndoles de forma enfrentada, negando profesores acordies a cupos pesie a que los tribunales yá los declararon illegales, etc. Por ello dende Iniciativa pol Asturianu entendemos que l'asignatura d'asturianu tien que cambiar dafechu'l so modelu. Tien que ser una asignatura pa tolos alumnos y alumnes de tolos niveles del sistema educativu, dende educación infantil a bachilleratu, una asignatura normal del currículu.
Queremos que los asturianos del futuru tengan la llibertá d'escoyer que llingua usen nel so día a día, pero la única forma de facelo ye garantizando que salen del sistema educativu obligatoriu con un nivel sufciente del so idioma. Esto solo pue garantizase si l'asignatura tien un tratamientu asemeyáu al que tienen otres llingües.
Amás, ye'l momentu d'introducir l'usu del asturianu como llingua vehicular n'asignatures, pa que l'asturianu seya una llingua normal más dientro del centru educativu y nun tea arrequexada namás a les hores d'asturianu, como si fuera una llingua estranxera, o inclusive peor, pues l'inglés entama a usase como vehicular en dalgunos centros.
Queda muncho por facer nel sistema educativu nesti ámbitu. Hai ferramientes pedagóxiques, profesionales formaos y base llegal pa facelo. Falta namás la voluntá política de llevalo alantre.
