Entá queden places pa matriculase a distancia o en presencial nos cursos d'Iniciativa pol Asturianu. La quinta edición de los Cursos d’Asturianu en Xixón, una esperiencia formativa qu’entama en collaboración cola Academia de la Llingua Asturiana y el Conseyu de Mocedá de Xixón, lleva un bon ritmu de matriculaciones y tien abiertu'l plazu hasta los primeros díes d'ochobre.
El convidáu d'esta selmana n'Iniciativa pol Asturianu nes ondes ye Miguel Gallego, responsable de la torna d'El Hobbit al asturianu. La espublización pa final d'añu del célebre llibru del xéneru mitolóxicu “El Hobbit” del escritor anglosaxón Tolkien, qu’escribió tamién el célebre "El Señor de los Aniellos", paez que va convertise nun fenómenu esta Navidá.
Iniciativa pol Asturianu presentó va un mes una quexa al Conceyu d’Uviéu pola falta d’usu del asturianu nel sistema de tresporte públicu de viaxeros d’Uviéu (TUA) La quexa púnxose en conocimientu de les fuercies polítiques presentes nel plenu, ya Izquierda Xunida convirtió esta quexa nuna moción, que güei, na Comisión d’Economía, acabó por aprobase colos votos a favor d’IX, PP y PSOE, y l’abstención de Foro.
La Casa d’Asturies en Valencia en collaboración con Iniciativa pol Asturianu y l’Academia de la Llingua Asturiana presenten el I Cursu d’Asturianu en Valencia. El cursu impartiráse de forma presencial en 25 hores dividides en clases de dos hores, un día a la selmana, d’ochobre a xineru de 2015 nel llar de la Casa d’Asturies.
niciativa pol Asturianu quier amosar el so refugu a la esclusión de la llingua asturiana en toles estayes del grupu Transportes Unidos de Asturias S.A. (T.U.A.), qu’ufre’l serviciu públicu de tresporte d’autobús nel conceyu de la capital, y que ta acabante d’estrenar un nuevu web y llínies de serviciu.
La vocalía d'Enseñu d'Iniciativa pol Asturianu felicitó y ufrió'l so sofitu a l'Asociación de Mas y Pas del IES Juan José Calvo de Sotrondio (Samartín del Rei Aurelio) pola carta unviada recién a la Conseyera d'Educación quexándose polos recortes del profesoráu d'asturianu y pidiendo que se garantice l'enseñu del idioma en tolos niveles.
Iniciativa pol Asturianu va participar na convocatoria del Conseyu Asesor de la Llingua asturiana del Conceyu de Xixón, que va celebrase'l viniente miércoles 1 d’ochobre, dempués de más d'un añu ensin convocase. La organización celebra que por fin se ponga en marcha esti órganu que na práctica lleva tola llexislatura ensin actividá.
Iniciativa pol Asturianu nes ondes llega con un nuevu programa nel que falamos del llibru “¡Hablad en cristiano! Procesos de nacionalización llingüística na construcción de los estaos-nación”. El so autor ye l’historiador xixonés Pablo Rodríguez Alonso que mos atiende al traviés de la llinia telefónica.
Yá pue sentise una edición más d'Iniciativa pol Asturianu nes ondes, el programa selmanal dirixíu por Samuel Gradín y emitíu en más d'una docena d'emisores d'Asturies. El programa d'esta selmana inclúi les intervenciones d'alumnos y profesoráu de los IV Cursos d'Asturianu en Xixón y coincide cola apertura del plazu de matrícula pa los V Cursos d'Asturianu en Xixón.
Iniciativa pol Asturianu unviaba va unes selmanes una reclamación al Conceyu de Mieres dempués de recibir una quexa porque esti nun permite l'usu del asturianu nun concursu lliterariu. Díes dempués d’unviar la quexa la conceyala de Consumu, Xuventú ya Infancia púnxose en contactu cola organización pa esplicar la so disposición a facer los cambios necesarios pa que l’asturianu nun seya marxináu nesti concursu.