Iniciativa pol Asturianu felicitó estos díes al Real Institutu d'Estudios Asturianos (RIDEA) al traviés d'una carta al so director, Ramón Rodríguez, pola celebración del congresu «Manuel Menéndez y l’Asturies occidental mediu sieglu depués», que mira pa la llingua asturiana, como lo fizo l'IDEA n'otres etapes, y sobre manera porque lo fai usando con normalidá la llingua asturiana na cartelería del eventu, dalgo inédito na entidá.

 

Pa Iniciativa pol Asturianu ye un pasu bien importante qu'una institución del pesu y la hestoria del RIDEA dea esti pasu alantre qu'esperamos que seya un signu de normalidá que tenga visibilidá nel futuru con nueves acciones (el propiu nome de la institución en billingües, la páxina web, otres actividaes, etc.) Esta decisión allégranos y paez que pon al RIDEA en postures mui diferentes a les d'anteriores etapes cercanes nel tiempu, y esperamos que superaes. 

 

El congresu «Manuel Menéndez y l’Asturies occidental mediu sieglu depués»  qu’entamen la Universidá d’Uviéu (Seminariu de Filoloxía Asturiana) y el Real Instituto de Estudios Asturianos (RIDEA) los díes 28 y 29 d’ochobre, va celebrase na Sala de Conseyos del Departamentu de Filoloxía Española (Campus d’El Milán, Uviéu) y nel Salón d’Actos del RIDEA (Pza. Porlier, Uviéu). La entrada ye llibre pa toles sesiones. Presentaránse dos llibros inéditos del llingüista homenaxáu: "Toponimia, refranes y conjuros" y "Palabras y cosas de Bermiego".