Ufrimos equí les Pallabres inaugurales de los V Cursos d'Asturianu en Xixón, lleíes pol presidente d'Iniciativa pol Asturianu, Inaciu Galán y González, qu'inauguró los cursos xunto al miembru de l'Academia de la Llingua Asturiana, Pablo Xuan Manzano y a Javier Cubero, en nome del CUPA.
Mui bones tardes:
Estimáu académicu, estimaos respresentantes del Conceyu Universitariu pol Asturianu ya Iniciativa pol Asturianu, alumnes y alumnos, equí na aula, y al traviés de la rede, na modalidá a distancia:
Tamos equí y paez que foi ayeri cuando punximos en marcha estos cursos, pero non. Munchu trabayu, un gran esfuerzu d’Iniciativa pol Asturianu, del CUPA y de l’Academia de la Llingua Asturiana, pero sobre manera, la importante demanda de la xente por conocer la so llingua, ye lo que permitió qu’algamemos esta quinta edición de los cursos, pasando yá de les 200 persones formaes nestes aules.
Yera dalgo que nun podíemos imaxinar cuando ficimos el primer cursu de nivel básicu, pero güei ye una realidá. Y ye qu’amás d’estos cursos en presencial y la creciente demanda a distancia, tenemos tamién en marcha un cursu presencial na Casa d’Asturies en València, gracies a un alcuerdu d’Iniciativa pol Asturianu con esi centru. Y nel 2015 vamos facer por siguir medrando la presencia de los cursos. Porque pa Iniciativa pol Asturianu ye claro que conocer la llingua asturiana, y poder usala con normalidá, ye la meyor ferramienta pa que los asturianos puedan protagonizar la recuperación y el crecimientu del asturianu, la única forma de garantizar la so sobrevivencia.
Güei entamamos de forma oficial la quinta edición de los Cursos d’Asturianu en Xixón y equí tais los alumnos, otros siguiéndomos a distancia. Como director de los cursos nun puedo más que deseavos tola suerte y davos la norabona por formar parte d’esos asturianos y asturianes que quieren saber más de la so llingua, d’esos asturianos qu’abandonen los prexuicios que mos metieron na tiesta contra lo propio, contra la nueso, d’estos asturianos y asturianes que deciden que quieren que l’asturianu tenga futuru como una llingua normal.
Préstame enforma da-y la bienllegada a Pablo Xuan Manzano, miembru de l’Academia de la Llingua Asturiana y da-y les gracies por acompañamos un añu más equí, esperando que-y faiga llegar esti agradecimientu a la institución que representa.
Nun puedo dexar de da-y les gracies al Conseyu de la Mocedá de Xixón, que collaboren con nós pa que pueda llevase alantre esti programa formativu.
Sé que toos entamáis con ganes ya ilusión, y esperao que’l cursu cumpla les espectatives. Vamos tener tiempu pa estudiar gramática, vocabulariu, ortografía… pero tamién pa entreníes y prestoses xeres que van divertinos al mesmu tiempu que refuercien lo deprendío.
Aguardo que toos cumpláis los oxetivos colos qu’aportáis a esti cursu y qu’esti seya una esperiencia granible. Trabayaremos pa facelo posible.
Munches gracies.
