Iniciativa pol Asturianu y la compañía Appsturias roblaron un conveniu de collaboración pa intentar normalizar y fomentar l'usu del asturianu nes nueves tecnoloxíes. L'alcuerdu inclúi'l compromisu per parte de la compañía d'ufrir facilidaes y descuentos a les persones y entidaes que pongan en marchar aplicaciones pa móviles n'asturianu.
La delegación d'Iniciativa pol Asturianu que participó’l pasáu xueves 25 de xunu na misión internacional presente nel 29 Conseyu de Drechos Humanos celebráu pol Altu Comisionado de la Organización de les Naciones Xuníes (ONX) en Xinebra, formada por Inaciu Galán y Marissa Bordallo, presentó los resultaos del viaxe nuna rueda de prensa.
A solicitú del nuevu alcalde de Bimenes, Aitor García Corte, la pancarta d'Iniciativa pol Asturianu, col testu "Queremos un futuru n'asturianu: oficialidá, dignidá, normalización" cuelga estos díes y con motivu de la Fiesta de la Oficialidá de la fachada de la Casa Conceyu de Bimenes, xunto a otres pancartes reivindicatives. Un xestu que valoramos de forma mui positiva, yá que-y da visibilidá a la reivindicación llingüística nesti conceyu.
El miércoles a les 12 hores nel llar de l’Academia de la Llingua Asturiana presentaránse los resultaos del viaxe qu’una delegación d’Iniciativa pol Asturianu fixo xunto a la organización ELEN (European Language Equality Network) a la que pertenez, a la sede de les Naciones Xuníes en Xinebra (Suiza) onde’l 25 de xunu celebrábase una sesión de control sobre’l cumplimientu de los Drechos Humanos per parte del estáu español, incluyendo los drechos llingüísticos de los asturfalantes.
Estos díes atrás dellos de vosotros y vosotres, alcaldes y alcaldeses, conceyales, diputaos y diputaes asturianos, xurastis el cargu qu’entamáis a exercer agora. N’alredor de 24 conceyos, decenes de conceyales y dos alcaldes, amás de dellos diputaos, ficístislo n’asturianu o en gallego-asturianu, ensin importar el partíu o’l posicionamientu ideolóxicu, usando l’asturianu como lo que ye, el patrimoniu cultural ya identitariu de tolos asturianos y asturianes.
Esta visita surde frutu del trabayu entamáu nel ámbitu internacional por esta organización y pola pertenencia de la mesma, como representante d’Asturies, a la entidá internacional European Language Equality Network (ELEN) formada por organizaciones en defensa de llingües en peligru de toa Europa.
Un nuevu programa d'Iniciativa pol Asturianu nes ondes ta colgáu na rede y pue sentise nes más d'una docena d'emisores que radien el programa en toa Asturies. Entamamos falando con Inaciu Galán, escoyíu nel so segundu y últimu mandatu como Presidente de l'asociación Iniciativa pol Asturianu ñacida nel mes d’ochobre de 2011 y que dende entós vien poniendo la so voz na reivindación llingüística, denunciando casos de discriminación y llevando a cabu avances al traviés de la reivindicación, la negociación y la collaboración con otres entidaes públiques y privaes.
Un nuevu programa d'Iniciativa pol Asturianu nes onde ta disponible. Entamamos contautando al traviés de la llinia telefónica con Isabel Hevia que ye la encargada d'empobinar un cursu dientro de la UABRA (Universidá Asturiana de Branu) onde se va falar de xestión cultural.
Estos díes felicitábemos a los y les conceyales que xuraron o prometieron el so cargu n'asturianu en más de 24 conceyos d'Asturies. Agora felicitamos tamién al nuevu alcalde de Bimenes, Aitor García Corte (Partíu Asturianista) y l'alcaldesa de Peñamellera Alta, Rosa Domínguez de Posada (Foro) tomaron posesión del so cargu n'asturianu. Ye un xestu que celebramos pero qu'esperamos que venga acompañáu de la toma de les midíes necesaries pa normalizar l'usu del asturianu nel ámbitu de los sos Conceyos.
Iniciativa pol Asturianu nes ondes emite nesta ocasión una entrevista con Francisco José Faraldo, que foi direutor del primer centru onde s'introduxo l'asturianu como asignatura escontra la llei nel so momentu y foron espedientaos por ello (añu 1983).