Dientro del puestu informativu van vendese llibros y va presentase’l númberu 14 de la revista Formientu
Iniciativa pol Asturianu va tar presente con un puestu dientro de la celebración de la I Feria del L.libru de L.luarca, que va tar abierta dende les 11 a les 18:30 hores d’esti sábadu 16 nes cais de la cabecera del conceyu de Valdés. Iniciativa pol Asturianu quier con esta presencia apurrir información, facer socios y dar a conocer la organización nel conceyu del Padre Galo.
Presentación de FORMIENTU 14
El puestu sedrá conxuntu cola revista de lliteratura mui moza, Formientu, que va presentar el númberu 14 de la mesma, que ta prevista, con un pequeñu recital, pa les dos de la tarde.
La publicación, qu’algama yá los sos diez años de vida, incorpora nesta ocasión a un autor portugués qu’escribe en mirandés, la variedá del asturianu que se fala nesa comarca portuguesa, Tiégui Alves, residente en Burdeos.
Moisés Cima, Claudia Elena Menéndez, Francisco Priegue, Andrés Astur Treceño, Naomi Suárez o Berto Cla, Raquel F. Menéndez son otros poetes incluyíos nesti últimu númberu. Marcos Salazar, Alba Carballo, Alicia Cortina y Xurde Álvarez Antón, ente otros, apurren les sos creaciones a la sección de narrativa.
