El vienres 6 de mayu salimos otra vegada a la cai pa reclamar la oficialidá del asturianu. La primer gran manifestación pol asturianu tuvo llugar un 22 de xunu de 1976 en Xixón, embaxo’l lema “Autonomía rexonal. Bable nes escueles”. Cuarenta años más tarde, l’asturianu ta nes escueles de forma precaria, l’autonomía nun foi la ferramienta que s’esperaba pa salvaguardar ya impulsar hacia’l futuru a la nuesa llingua y la nuesa cultura. Pero ye innegable, diéronse pasos, anque toos ellos nun llegaron de baldre o por iniciativa propia de les instituciones, sinón gracies a la reivindicación, la movilización y la presión ciudadana a los nuesos dirixentes.
4.000 persones, según datos de la Policía, percorrieron les cais d’Uviéu nel Día de les Lletres Asturianes pa reclamar la oficialidá del asturianu. Miembros y simpatizantes d’Iniciativa pol Asturianu particiaron cola so pancarta na Manifestación pola #Oficialidá amosando en pancartines de mano los diez puntos del so Decálogu de Drechos Llingüísticos presentaos nes redes sociales los meses previos a la manifestación.
Iniciativa pol Asturianu entama los díes 16 y 30 d'esti mes de mayu, y con idea de continuidá, un Club de Llectura n'asturianu, col llibru "La vuelta al mundo n'ochenta díes" de Julio Verne (Torna de Xesús González Rato). L'oxetivu ye ameyorar los conocimientos d'asturianu asina como encamentar a los participantes a lleer llibros na nuesa llingua.
Iniciativa pol Asturianu va participar esti vienres 6 de mayu cola so pancarta na Manifestación pola #Oficialidá. La organización fai un llamáu a los asturianos y asturianes pa que vuelvan a salir a la cai pa reivindicar la reconocencia del estatus llegal d'oficialidá pal idioma nel Día de les Lletres Asturianes. Cada vegada son más les persones que se sumen a esta reivindicación xusta y que pide la reconocencia de los drechos civiles de tolos ciudadanos.
Dende 1989, l’Ayuntamientu de Xixón tomó’l determín de sofitar el Premiu Café Gijón de novela, patrocinándolu nesta edición de 2016 con un premiu de 20.000 euros, especificando nes bases que namás pueden presentase obres en llingua castellana.
Iniciativa pol Asturianu ta asesorando en cuestiones llingüístiques y va ayudar nel correctu etiquetaxe n'asturianu del proyectu Asturcilla, col que se pue collaborar agora nun proyectu de financiamientu collaborativu que ta abiertu na rede.
El sábadu, 30 d'abril Iniciativa pol Asturianu va celebrar la cuarta Xunta Xeneral d'asociaos, abierta a tolos socios simpatizantes y miembru.
Tres la propuesta d'Iniciativa pol Asturianu del pasáu mes de febreru, pola que se pidió al Conceyu d’Uviéu que'l nome de la entrada a la ciudá d’Uviéu pela A-66 fuera'l tradicional y non la versión deturpada “San Julián de los Prados”, el Conceyu anuncia agora que la cai tendrá'l nome coles dos formes, incluyendo la tradicional Santuyano.
Iniciativa pol Asturianu presentó esti xueves nuna rueda de prensa “Una RTPA pa la próxima década. Informe d’Iniciativa pol Asturianu con un analís de los diez años caberos y propuestes llingüístiques y culturales pal Mandatu Marcu”. Un documentu col que busquen, en pallabres d’Inaciu Galán, presidente de la organización “apurrir propuestes pa da-y utilidá social a la RTPA nos vinientes diez años, convirtiéndola nuna ferramienta eficaz na tresmisión del asturianu y na vertebración d’Asturies”.
Nesta rueda de prensa, na que participarán dellos representantes de la organización, va presentase’l documentu “Una RTPA pa la próxima década.Informe d’Iniciativa pol Asturianu con un analís de los diez años caberos y propuestes llingüístiques y culturales pal Mandatu Marcu”.

SÍGUINOS

7,691SiguidoresPréstame
1,457SiguidoresSiguir
5,770SiguidoresSiguir
300soscriptoresSoscríbite

Últimes noticies