“Axuntar el debate de la oficialidá con una medida que va meyorar les condiciones llaborales de los y les docentes resulta mezquino y falaz”
“L’aprobación de la especialidá docente ya fue un compromisu del PP nel añu 2012 qu’hasta UPyD apoyó”
“Si Mercedes Fernández llogró llegar al llímite del absurdu col asturianu, Gázquez consiguió superalu ayeri na Cámara Baxa pa llegar a un nivel cutre, llamentable y de chigre”
XIXÓN, 07/10/2021. Dempués de l’aprobación de la Proposición Non de Llei reclamando la especialidá docente de Llingua Asturiana na Comisión d’Educación del Congresu de los Diputaos, Iniciativa pol Asturianu llamenta la postura Paloma Gázquez, diputada del PP, por oponese a la creación de la especialidá docente de Llingua Asturiana. La especialidá docente ye, en definitiva, el reconocimientu oficial del profesoráu d’asturianu pa que los y les docentes tengan unes condiciones llaborales dignes iguando d’esta manera una situación inxusta ya que siguen ensin poder acceder a unes oposiciones y siempres como profesoráu interín. Aprobar la especialidá docente d’asturianu va valir pa dignificar l’asignatura y respetar los drechos llaborales de los profesores.
Nesi sen, la organización manifestó que “l’aprobación de la especialidá docente ya fue un compromisu del PP nel añu 2012 y qu’hasta UPyD apoyó en dalguna votación na Xunta Xeneral. Axuntar el debate de la oficialidá con una medida que va a meyorar les condiciones llaborales de los y les docentes resulta mezquino y falaz como fizo Gázquez nel Congresu”.
Iniciativa pol Asturianu recuerda tamién que “en varies ocasiones treslladóse dende esta organización a los y les representantes asturianes nel Congresu y nel Senáu la importancia d’aprobar la especialidá docente, incluyendo a Paloma Gázquez, alcontrando siempres el sofitu a esta reclamación. Nun entendemos agora la negativa repentina a iguar esa desigualdá hestórica. Si Mercedes Fernández llogró llegar al llímite del absurdu col asturianu, Gázquez consiguió superalu ayeri na Cámara Baxa pa llegar a un nivel cutre, llamentable y de chigre”.
Iniciativa pol Asturianu tamién quier tresmitir al restu de grupos parllamentarios y representantes, de manera especial, a Sofía Castañón por presentar la iniciativa y a Roberto García Morís por sofitala, l’agradecimientu pol trabayu pa sacar alantre esta Proposición Non de Llei.
