XIXÓN, 11/10/2021. Iniciativa pol Asturianu va participar na manifestación pola oficialidá convocada pola Xunta pola Defensa de la Llingua Asturiana pal prósimu sábadu 16 d’ochobre n’Uviéu. D’esta manera, la organización quier sumase a esta convocatoria pa visibilizar al másimu la reclamación de la oficialidá de la llingua asturiana. La marcha va salir de magar les 12 hores de la Estación del Norte d’Uviéu.
Animamos a tolos nuesos socios, simpatizantes y persones enfotaes nel futuru del idioma a participar con nós na manifestación. Ye’l momentu de llevantar la voz pola nuesa llingua nel meyor momentu históricu pal idioma. Ye’l momentu de facer visible na cai’l consensu a favor del idioma qu’hai na sociedá asturiana. Por too ello, facemos un llamáu a la participación na convocatoria del prósimu 16 d’ochobre.
Iniciativa pol Asturianu fai esti añu 10 años de trabayu pol idioma. Una década na que tratamos d’implicar a tola sociedá asturiana nel procesu de recuperación y normalización del asturianu, trabayando pol consensu y sumando voluntaes. Polo tanto, camentamos imprescindible que la sociedá s’implique y faiga oyer la so voz, que ye mayoritariamente favoratible a que l’asturianu se convierta nuna llingua normal, que pueda usase en tolos ámbitos y que tenga garantizáu’l so futuru, lo que solo ye posible si esta llingua ye oficial.
