XIXÓN, 19/10/2021. La Comisión de Cultura del Congresu de los Diputaos aprobó esti martes una Proposición Non de Llei (PNL) que solicita que les llingües non oficiales puedan acceder a les ayudes y sovenciones que convoca’l Ministeriu de Cultura. Anguaño, solo les llingües con reconomientu d’oficialidá pueden acceder a estes ayudes, en cambeu, otres como ye’l casu del asturianu o del aragonés, non.
La iniciativa parlamentaria, que ñaz d’una reclamación y propuesta d’Iniciativa pol Asturianu, reivindica la igualdá de les llingües non oficiales pa poder acceder a les sovenciones del Ministeriu de Cultura, lo qu’en definitiva, permitiría a la llingua asturiana participar n’igualdá de condiciones col restu d’idiomes d’España. Nesi sen, Iniciativa pol Asturianu agradez a la diputada de Xuníes Podemos, Sofía Castañón, la presentación de la PNL y el sofitu a la mesma de los partíos. Amás, la organización recuerda qu’Asturies ta perdiendo fondos estatales y europeos pola falta d’oficialidá de la llingua asturiana nel Estatutu d’Autonomía.
Hasta agora, solo les llingües con reconocimientu d’oficialidá pueden acceder a estes ayudes, en cambeu, otres como ye’l casu del asturianu o del aragonés, non. El pasáu mes de xunetu, Iniciativa pol Asturianu denunció que’l Ministeriu de Cultura escluyía al asturianu de les ayudes a la traducción ente llingües d’España por nun ser oficial. La organización fizo público qu’una obra que solicitaba l’ayuda pa traducir del gallegu al asturianu y que taba dientro de la convocatoria de «Subvenciones para la traducción de libros entre lenguas del Estado», resultó denegada por ser «Lengua no recogida como oficial en el Estatuto de Autonomía de la Comunidad Autónoma (Art. 1 segundo párrafo, de conv.)».
