Iniciativa pol Asturianu reclama al Conceyu de Tinéu que recupere la llingua asturiana
dientro de los formularios de solicitú de matrícula de la Escuela Municipal de Música, que
dende va años taben disponibles al empar n’asturianu y en castellán. Hasta agora les dos
llingües veníen conviviendo n’harmonía y ensin nengún tipu de conflictu nin quexa per parte de los escolinos, trabayadores municipales o miembros de la comunidá educativa. Les instancies d’angüaño, disponibles na páxina web, suprimen la presencia de la llingua
asturiana. D’esta forma’l Conceyu da un pasu atrás na normalización del asturianu,
eliminando una torna fecha pola técnica responsable del Serviciu de Normalización
Llingüística.
Pa la organización de reivindicación llingüística esta decisión ye incomprensible y supón un
pilancu na normalización social del asturianu. La presencia de la llingua propia nes fueyes
de matriculación nun supón nengún costu pal Conceyu de Tinéu nin xeneró hasta la fecha
nenguna quexa. L’asociación considera que la omisión del usu del asturianu nesta
documentación ye contraria a la Llei d’Usu y Promoción del Asturianu aprobada por el
Partíu Popular, que gobierna nel Conceyu, nel añu 1998. «Nun se xustifica presumir
d’aprobar la Llei d’Usu al mesmu tiempu que se dan pasos atrás na presencia normal,
voluntaria y harmoniosa de la llingua asturiana nun documentu bilingüe».
Por esta razón, lniciativa pol Asturianu fizo llegar esta quexa al Conceyu de Tinéu y al Partíu Popular d’Asturies pa esixir una rectificación y recuperar la presencia normal del idioma na documentación. “Ye’l momentu de demostrar la defensa de la llexislación vixente, de la llibertá y del cambéu d’actitú del PP en rellación a les llingües d’Asturies”.
