Pallabres d’Inaciu Galán nel homenaxe a Sabel Tuñón

Garbelles de Baxo, Caldones, Xixón, 20 de xunu del 2024

Queríos amigos y amigues:

Güei tomo la pallabra en nome d’Iniciativa pol Asturianu y nel míu propiu pa, vierbu a vierbu, pone-y pallabres a esti homenaxe a Sabel Tuñón Ces. Nun ye un llabor abegosu esti sinón una prestosa xera cola que quiero falar de les razones que mos lleven a facer esti homenaxe. De mano aclarariar que Sabel, como podéis ver, ta perbién de salú, cada día meyor, y nun ye esti un homenaxe pa que pueda xubilase de la militancia asturianista, sinón pa da-y puxu y que siga trabayando. Porque bien sabe Sabel que “Hai que siguir, asina y equí”, pa que sí sepan que “tuviemos equí, asoleyando un país”. Un país, Asturies, que gracies a xente como Sabel Tuñón, nun cayó definitivamente na mar y alita cada vegada con más fuercia.

Esti homenaxe ye tamién una decisión pensada d’Iniciativa pol Asturianu, porque nuna sociedá onde trabayar a favor del asturianu y la cultural asturiana ye más un sacrificiu qu’una reconocencia, ye importante que sepamos ser nós tamién los que reconozamos el llabor fechu a los de nueso. A eses persones como Sabel, que dende un segundu planu vienen trabayando en tolos ámbitos de la vida pública y privada pol asturianu.

Conocí a Sabel Tuñón va esti añu 20 años. Cuando la conocí llevaba yá más de 20 años de militancia, y nun dexó de siguir militando nunca. Dispuesta a trabayar y dar la cara pola so llingua y la so cultura, hasta nos momentos más complicaos de salú. Pa min, Sabel Tuñón foi, y ye, un exemplu de vida comprometida.

La so arrogancia llevóla a participar en tolos proyectos nos qu’unos y otros fuimos enguedeyándola a lo llargo la vida, pola so gran valía y la so forma de ser abierta, que fixo que fuera siempres una ponte ente distintes sensibilidaes del asturianismu.

Namás por facer un repás curtiu al so llabor, podemos recordar que Sabel Tuñón foi parte d’entidaes culturales y polítiques dende los años ochenta, trabayando por Asturies y pol asturianu, dende tolos ámbitos posibles: la revindicación, el llabor escolar, onde como madre foi parte de l’AMPA del Colexu Públicu Jacinto Benavente, en La Camocha, y xunto con otres persones, Urbano Rodríguez, como director, Llábana como maestru, namás como dos exemplos de munchos, llograron qu’aquel centru fuere conocíu un tiempu como “La ikastola”, pol trabayu comprometíu col usu del asturianu tresversal d’esti grupu nel que Sabel yera parte fundamental.

Foi en La Camocha tamién, onde nació en 1963, au Sabel Tuñón presidió munchos años l’Asociación de Vecinos, onde tamién l’asturianu tuvo presente con tola normalidá. La so facete más reivindicativa taba pa lluchar pol asturianu, pero tamién pol so barriu y polos derechos de la muyer, por toles causes xustes, hasta poles que munchos consideraben causes perdíes.

El llabor colectivu, ensin busca de protagonismu nengún, con esa arrogancia de la que vos falaba, describe perbién a Sabel Tuñón.

La so allegría, el so saber seducir pal asturianu, fai que la firmeza nes sos reivindicaciones nun evitara nunca que Sabel se ganare la simpatía de tol mundu, hasta de los políticos a los que-yos reclamaba, y a los qu’en munches ocasiones convenció tamién pa la causa.

Paezme que’l meyor exemplu de la so capacidá de convencimientu ye l’exemplu de Takeshi Moritaku, un rapaz Xaponés qu’acabó en casa de Sabel Tuñón nun programa d’acoyida pol que venía a deprender castellán, ¿a La Camocha? Sí. A la fin, tando en casa de Sabel, acabó por apuntase a un cursu d’asturianu impulsáu por ella y dexando les clases de castellán. Colos años, xuntos, fixeron un diccionariu xaponés-asturianu/asturianu-xaponés, con guía de conversación, que sigue inéditu.

Nel so llabor como monitoria y animadora, fixo milenta talleres de cultura asturiana nos que tresmitió la cultura asturiana y la llingua a tantes neñes y neños de Xixón y d’Asturies, que ye incuntable ya impagable. Tamién punxo cursos d’asturianu y participó como profesora na Universidá Asturiana de Branu de l’Academia de la Llingua Asturiana, na escuela de deportes y xuegos tradicionales que se montó en Xixón nun curtiu periodu de tiempu, cola Terturlia Cultural El Garrapiellu y en milenta iniciatives más, faciendo teatru, radio…

Como escritora, anque entá tien muncho pendiente por asoleyar, espublizó dellos volúmenes pa primeros llectores, dellos con Lourdes Álvarez, como Animalinos, La Primavera, Kiko Perico… asina como dalgún rellatu y poema, apaeciendo n’antoloxíes como Escritores Asturianes y Cuántu carbón saldría. Asoleyó tamién una guía sobre Andrés Solar, complementu a les visites que facía per Deva cola reciella.

N’Iniciativa pol Asturianu participa dende la so fundación, siendo vocal de voluntariáu ente 2012 y 2016 y más tarde ayalguera de la organización, cargu qu’ocupó hasta 2022. Nesi tiempu participó trabayando abondo en tolo que pudo, que foi muncho.

Estes son namás unes pingarates del llabor fechu a lo llargo la so vida. Una vida de compromisu col asturianu.

Por tou esti trabayu y compromisu, güei Iniciativa pol Asturianu, fai esti homenaxe a Sabel Tuñón y entréga-y una placa que queremos que seya seña del nuesu ciñu y agradecimientu fondu. Gracies, Sabel, gracies.