Yá pue sentise'l quintu programa de radio "Iniciativa pol Asturianu nes ondes", col que se difunden les actividaes de la organización y onde cada mes pueden sentise entrevistes con miembros d'Iniciativa pol Asturianu y persones d'otros colectivos pa conocer y aldericar alredor del asturianu y la so situación. Nesta ocasión, Samuel Gradín, director del programa, entrevista a María Díaz Suárez, maestra d'asturianu y Vocal d'Enseñu d'Iniciativa pol Asturianu.
Iniciativa pol Asturianu fizo llegar va delles selmanes a la “Fundación Príncipe de Asturias” una carta solicitando qu’use l’asturianu nes sos actividaes y mui especialmente nos Premios Príncipe. Destacaben que na so páxina web nun incluya al asturianu, cuando puede lleese hasta en 11 llingües distintes, y cuando la otra fundación del Príncipe, la Príncipe de Girona, inclúi una versión en catalán como páxina principal y un llogotipu billingüe en castellán y catalán.
El Gobiernu de Javier Fernández (FSA-PSOE) ta acabante anunciar al traviés del BOPA un nuevu amenorgamientu de los prespuestos dedicaos a normalización llingüística. La partida afectada nesti casu ye la dedicada a Normalización social del asturianu y gallego-asturianu pa les entidaes llocales, una ayudes que sirven pa llevar a los conceyos, la entidá alministrativa más cercana al ciudadanu, les polítiques de normalización llingüística, qu’amás xeneren emplegos al traviés de los servicios de normalización.
Un equipu del Voluntariáu d'Iniciativa pol Asturianu participó con un puestu informativu na "Espicha FIG 2012", celebrada esti sábadu 20 d'ochobre, nel Atenéu de Villaviciosa pola Banda de Gaites de Villaviciosa. Nel mesmu informóse a un gran númberu de maliayos al rodiu de l'actividá del nuesu coleutivu.
Iniciativa pol Asturianu participa na organización d'esti cursu, a comuña col Conceyu Universitariu pol Asturianu (CUPA) y abre’l plazu p’apuntase a la que yá ye la tercer edición de los Cursos d’Asturianu en Xixón, una esperiencia formativa que s’entama en collaboración cola Academia de la Llingua Asturiana. El cursu, que se va facer na sede del Conseyu de la Mocedá de Xixón (Avda. Manuel Llaneza, 68), va entamar a partir de la segunda quincena del mes de payares (el martes 13 de payares), cuntando con 35 hores llectives.
La militancia de la organización audirá a la "Espicha FIG 2012" pa informar a los maliayos al rodiu de l'actividá del nuesu coleutivu y p'animalos a tomar la iniciativa pol asturianu. Amás taremos d'estrenu, ya que los asistentes tendrán la oportunidá de facese con un mapa de la división parroquial d'Asturies -col so nome tradicional- a un preciu de solo 5€.
Esti miércoles 10 d’ochobre, Inaciu Galán, presidente d’Iniciativa pol Asturianu foi recibíu nel llar de la Secció Filològica del l’Institut d’Estudis Catalans (IEC), l’academia de la llingua catalana, en Barcelona. Nel conceyu, Galán presentó l’informe que solicitá al IEC un cambiu na definición de los términos “asturià”, “lleonès” y “bable” nel so diccionariu.
Teresa Sanjurjo González, Direutora de la Fundación Príncipe d'Asturies, aconceyará con miembros d'Iniciativa pol Asturianu en feches próximes. La Fundación púnxose en contactu con Iniciativa pol Asturianu pa solicitar esti conceyu dempués de que la organización escribiera apocayá a esta institución pa reclama-y l'usu del asturianu nes sos actividaes y na so páxina web, onde usen más d'once llingües, pero non l'asturianu.
La Real Academia Española fizo llegar una comunicación del so Secretariu, Darío Villanueva, a Iniciativa pol Asturianu na qu’agradez la informe y propuesta unviaos por esta organización a la RAE pa solicitar la revisión y cambéu de la definción de los términos “asturiano” y “bable” nel so Diccionario, onde anguaño apaecen definíos como “dialectu” en llugar de llingua o idioma.
El presidente d'Iniciativa pol Asturianu, Inaciu Galán, tará esti miércoles en Barcelona pa presentar en mano énte l’Institut d’Estudis Catalans (IEC), academia de la llingua catalana, un informe tituláu “Definir el términu “asturianu” con xeitu. Informe sobre la presencia del vocablu “asturianu” y otros términos nos diccionarios normativos d’otres llingües”. Un trabayu que propon a la institución que’l términu “asturianu” dexe de referise a “conxuntu de fales” pa responder a la realidá ciéntifica y llegal, que dexa a les clares que l’asturianu ye un idioma.