Inaciu Galán y Vítor Suárez, miembros de la dirección d’Iniciativa pol Asturianu aconceyaron esti miércoles 31 d’ochobre na sede d’Izquierda Xunida d’Asturies cola diputada Emilia Vázquez, en representación del grupu parllamentariu d’IX, y el senador Jesús Iglesias. El conceyu celebráu n’Uviéu xiró alredor de l’actualidá del idioma y de les iniciatives que la organización política pueda presentar nun futuru. Dende I’asociación valoróse positivamente qu’IX ye l’únicu grupu parllamentariu que recueye nel so programa la oficialidá de forma abierta.
Iniciativa pol Asturianu presentó a Izquierda Xunida la so opinón al rodiu del Informe sobre’l cumplimientu de la Carta de les Llingües Minoritaries d’Europa, tratáu firmáu pol estáu español, y nel que’l Gobiernu d’Asturies nun salió bien paráu de les valoraciones del Conseyu d’Europa, qu’encamienta a la oficialización del idioma, agora que se fala d’una posible reforma del Estatutu, y a una mayor presencia en tolos ámbitos (educación, medios de comunicación, etc.)
Recordóse a Izquierda Xunida la necesidá d’oficialidá del asturianu, asina como de desenrrollar la Llei d’Usu del Asturianu. Solicióse amás a IX que faigan un control, como oposición que son, sobre’l llabor en Política Llingüística del actual Gobiernu d’Asturies. IX coprometióse a presentar delles entrugues parllamentaries sobre la cuestión.
Falóse tamién de los problemes presupuestarios de l’Academia de la Llingua Asturiana dempués de los recortes. La propuesta d’Iniciativa pol Asturianu pasa por destinar la partida de 27.000 euros dedicada a la Fundación pro Real Academia Española a l’ALLA y solicitar al Gobiernu d’España una financiación asemeyada a la que da al restu d’academies d’otres llingües oficiales del estáu. El Senador Jesús Iglesias comprometióse con Iniciativa pol Asturianu a facer una enmieda a los Presupuestos Xenerales del Estáu pa que l’Academia de la Llingua Asturiana reciba una partida, como’l restu de les academies de llingües del estáu.
Falóse tamién de la situación de la toponimia asturiana por mor del inclumplimientu de los decretos, por parte del gobiernu, y les alministraciones llocales encamentándose a dicha fuercia política que faiga por iguar esta illegalidá, pa lo que Jesús Iglesias va presentar una entruga na Comisión de Fomentu nes cámares estatales. Per otru llau, púnxose enfotu na necesidá de rematar el procesu d’oficialización de los decretos de toponimia y l’aplicación de la toponimia oficial asturiana per parte de la Demarcación de Carreteres dependiente del Ministeriu español de Fomentu, pa lo que’l grupu parllamentariu d’Izquierda Xunida na Xunta Xeneral va elevar una entruga a Política Llingüística.
No que cinca a la rellación del asturianu col partíu, reconocíose que’l partíun use l’asturianu na so páxina web, documentos, elementos publicitarios, asina como de forma oral y pidióse que se siguiera reforciando esi usu, ufrieron la posibilidá d’organizar un cursu d’asturianu, como yá ficimos con Foru Asturies, pa miembros electos y personal del grupu parllamentariu, una propuesta que foi recibida de forma positiva, y qu’Iniciativa pol Asturianu va ufrir tamién a les demás fuercies de la Xunta Xeneral, cola idea de facelu nel propiu edificiu y facilitiar asina l’asistencia de diputaos y demás personal de los grupos.
Iniciativa pol Asturianu sigue esperando respuesta de los grupos parllamentarios de la FSA-PSOE, PP y UPYD. La organización aguarda poder aconceyar con estes fuercies pa siguir la so rolda de contautos y conocer la so postura sobre la situación del asturianu.
Audios de la rueda de prensa que tuvo llugar darréu del conceyu:
Intervención d'Inaciu Galán, presidente d'Iniciativa pol Asturianu
Intervención de Vítor Suárez, vicepresidente d'Iniciativa pol Asturianu
Intervención de Jesús Iglesias, Senador por Asturies
Intervención d'Emilia Vázquez, Diputada na Xunta Xeneral
Entrevista a Inaciu Galán sobre'l resultáu de la rolda de conceyos:
Sentir la entrevista al presidente d'Iniciativa pol Asturianu
