Nesta nueva edición del programa Iniciativa pol Asturianu nes ondes cuntamos nos nuesos estudios con Inaciu Galán, Presidente d'Iniciativa pol Asturianu, col qu'afondamos nes caberes noticies al rodiu'l nuesu idioma.
Iniciativa pol Asturianu nes ondes emite nesta ocasión una entrevista con Francisco José Faraldo, que foi direutor del primer centru onde s'introduxo l'asturianu como asignatura escontra la llei nel so momentu y foron espedientaos por ello (añu 1983).
Con él falaremos del so llabor como Presidente de la Fundación Caveda y Nava qu'el pasáu día 1 d’avientu del 2015 acordó poner puntu final a la so andadura como entidá de defensa de la llingua asturiana. Esti determín tomóse al entender que les circunstancies que xustificaron el crease camudaron sustancialmente, de manera que la so misión pue dase por cumplida, pues la so función dexó de tener el sentíu que tuvo nel so día.
Un nuevu programa d'Iniciativa pol Asturianu nes ondes llega con delles partes del programa de televisión "Alderiques d'Asturies" nel que se fizo una cobertoria especial na Manifestación pola Oficialidá del asturianu, de la mano de Jana Suárez.
Cada mes, nel programa radiofónicu Iniciativa pol Asturianu nes ondes emítese un editorial nel que la organización da la opinión sobre cuestiones llingüistiques y reflexona sobre les campañes en marcha, acciones, etc. Reproducimos equí la del mes de setiembre, que fala del momentu de crisis y como dalgunos actores políticos traten d'usala pa dar pasos atrás na normalización llingüística del asturianu.
Iniciativa pol Asturianu nes ondes pon en marcha sección nueva col periodista Damián Barreiro, especialista en tv y con un garapiellu llibros espublizaos al respeutive. Ufrirános toles selmanes una nueva seición áu treslladaremos un mediu tan importante como ye la televisión a la radio, afondando en series, películes, etc que se podríen usar pa normalizar el nuesu idioma.
La entrega octava d’Iniciativa pol Asturinau nes ondes, programa de la organización omónima, inclúi una entrevista na que Francisco Álvarez fala del llibru "Un país llamáu Dixebra", otra con Montse Machicado, de la Estaya de Llingua d'Avilés, falando de la campaña pal cambiu de nome y apellíos al asturianu, y una tercera de Diana Alba de la web del occidente d'Asturies, Qué Femos. Amás, como siempres l’editorial y la clas d’asturianu.
Un nuevu programa d'Iniciativa pol Asturianu nes ondes ta colgáu na rede y pue sentise nes más d'una docena d'emisores que radien el programa en toa Asturies. Entamamos falando con Inaciu Galán, escoyíu nel so segundu y últimu mandatu como Presidente de l'asociación Iniciativa pol Asturianu ñacida nel mes d’ochobre de 2011 y que dende entós vien poniendo la so voz na reivindación llingüística, denunciando casos de discriminación y llevando a cabu avances al traviés de la reivindicación, la negociación y la collaboración con otres entidaes públiques y privaes.
El convidáu d'esta selmana n'Iniciativa pol Asturianu nes ondes ye Miguel Gallego, responsable de la torna d'El Hobbit al asturianu. La espublización pa final d'añu del célebre llibru del xéneru mitolóxicu “El Hobbit” del escritor anglosaxón Tolkien, qu’escribió tamién el célebre "El Señor de los Aniellos", paez que va convertise nun fenómenu esta Navidá.
El cantante del grupu Los Berrones ye'l convidáu nesta ocasión nel programa Iniciativa pol Asturianu nes ondes, presentáu por Samuel Gradín y emitíu pela rede d'emisores a lo llargo de toa Asturies y na nuesa canal n'Ivoox.