Esti mes presentamos la campaña “La empresa asturiana muévese”, qu’inclúi una marca de calidá llingüística cola que queremos afalar al usu del asturianu nel etiquetaxe de productos y en xeneral, nos negocios. Pa Iniciativa pol Asturianu les empreses son parte imprescindible del procesu que tien que llevanos a un futuru meyor pal asturianu. Les empreses, como elementu imprescindible de la economía, xeneradores de riqueza y de puestos de trabayu, han tener tamién un compromisu col territoriu nel que desenvuelven la so actividá.
El Colexu Rural Agrupáu del Cabu Peñes, en Gozón, aprobó va dellos meses el cambiu pa denomase "Cabu Peñes" en llugar del castellanizáu "Cabo Peñas". Iniciativa pol Asturianu unvió una felicitación al centru aprovechando pa convidalos a siguir dando pasos na visibilidá del asturianu nel centru, talos como siguir faciendo medrar la matriculación na asignatura, usar l'asturianu na páxina web y na rotulación del centru, etc. Esti ye un nuevu exemplu que se suma a otros como los colexos xixoneses de Montiana o Xove y que surdió gracies a la propuesta d'un profesor miembru d'Iniciativa pol Asturianu y que pudo llevase alantre gracies al sofitu de tola comunidá educativa.
El pasáu 14 de xunu celebróse nel llar de la Federación Asturiana d'Empresarios (FADE) un actu nel que se presentó la campaña permanente "La empresa asturiana muévese", qu'Iniciativa pol Asturianu lleva meses preparando. La campaña quier implicar a empreses asturianes de tolos ámbitos nel usu del idioma. Pa ello nel actu cuntóse col exemplu d'empreses que yá usen l'asturianu y que se sumen a la campaña, pa dar a conocer l'ésitu d'estes iniciatives y cómo la llingua asturiana ye una ferramienta que-y da un elementu distintivu a les empreses. La campaña inclúi un Sellu de Calidá Llingüísticu que llucen yá dellos productos etiquetaos n'asturianu.
La organización Iniciativa pol Asturianu, al traviés de la so Vocalía d'Enseñu, ta acabante poner en marcha una campaña pa facer medrar la matriculación na asignatura d'asturianu nes escueles ya institutos d'Asturies, onde la demanda ye mui alta per parte de les families y alumnos, pero onde tovía apaecen importantes torgues pa matriculase na asignatura, con incumplimiento de la llexislación en dalgunes ocasiones. La campaña busca implicar al profesoráu d'asturianu con un folletu con un diseñu en blancu y negru que pueden imprentar ellos mesmos a baxu costu y según el volume d'alumnos del centru nel que trabayen.
El vienres 31 de mayu celebráronse en Cangues d'Onís dellos actos que sirvieron pa presentar Iniciativa pol Asturianu nel conceyu. Pela mañana, dellos alumnos del Institutu Rei Pelayo participaron nuna charra sobre l'asturianu na que se-yos dio a conocer la organización. Yá pela tarde-nueche, nel chigre Filandón, presentóse a los asistentes, qu'enllenaron el llugar, l'actividá de la organización.
Iniciativa pol Asturianu denunciare énte'l propiu Conceyu d'Uviéu y la Procuradora Xeneral d'Asturies el casu de discriminación vivíu por un miembru de la directiva de la organización, que foi obligáu a presentar un documentu en castellán nel rexistru del Conceyu, prohibiéndo-y presentalu n'asturianu. El casu, tresmitíu a les fuercies polítiques con representación nel plenu fizo surdir una propuesta d'Izquierda Xunida qu'esti vienres aprobaron por unanimidá PP, Foru, PSOE ya IX, y pola que se decidió redactar unes ordenances d'usu del asturianu qu'eviten más casos como esti y fomenten l'usu del asturianu nel conceyu que ye capital d'Asturies.
Nel programa d'esta selmana d'Iniciativa pol Asturianu nes ondes, Samuel Gradín fala con Vérval, del grupu Xera, que va celebrar un conciertu nel Teatru Campoamor d'Uviéu y col presidente de la organización Inaciu Galán, de cuestiones varies d'actualidá.
Un mesa redonda titulada "¿Qué pasa cola llingua?" y convocada pol Atenéu Llibertariu d'Uviéu celebróse'l vienres 24 mayu en Ciudá Naranco y cuntó cola participación d'Inaciu Galán (presidente d'Iniciativa pol Asturianu), Iris Díaz (Reciella -- families pol asturianu), Dolfu Camilo Díaz (escritor y xestor cultural), y Miguel Rodríguez (Trafego). Na mesma aldericóse alredor del pasáu, presente y futuru de la reivindicación llingüística. Ufrimos agora videu completu de la charra.
Yá ta disponible un mes más el boletín informativu dixital d'Iniciativa pol Asturianu con toles noticies y actividaes de la organización a la lo llargo del mes de mayu.
Los alumnos de terceru de la ESO del Institutu Rei Pelayo de Cangues d'Onís van participar nuna charra sobre la llingua asturiana qu'organiza Iniciativa pol Asturianu por petición del profesor del centru, Fonsu Martín, esti vienres 31 de mayu de magar les 12:25 hores. Na charra falaráse colos alumnos de la situación del asturianu y de la so visión como alumnos matriculaos na asignatura.