El Defensor Universitariu, Ramón Durán, unvió una carta con encamientos al Rector de la Universidá d’Uviéu, Vicente Gotor, col envís de que les situaciones de marxinación pol usu del asturianu na institución dexen de producise. La carta ye clara, l’equipu rectoral tien de modificar el Reglamentu d’usu del asturianu nel Rexistru, acordies colo yá espresao pol Tribunal Superior de Xusticia d’Asturies.
La Universidá d’Uviéu dio pasos importantes pal asturianu nos últimos años, pero entá queden munches promeses incumplíes por esti equipu rectoral. Ye importante que sigamos trabayando pa que la comunidá universitaria fuercie’l cumplimientu de los alcuerdos firmaos pol Rector, nos que se comprometió a crear un reglamentu pa la rotulación billingüe de la universidá asturiana, a oficializar un llogotipu billingüe, y a poner en marcha otres midíes pa la normalización del asturianu na institución.
La única forma de garantizar el drechu al usu del asturianu, reconocíu polos Estatutos de la Universidá, ye formando y sensibilizando al funcionariáu, y esto mesmo ye lo que-y dixo’l Defensor Universitariu a Gotor na so carta recién, unviada dempués del conceyu que tuvimos con él. Agora quédamos siguir peleando porque los encamientos pasen a convertise n’acciones y les promeses feches dexen de ser incumplimientos. Porque los pasos alantre nunca vienen solos.
