Iniciativa pol Asturianu va participar na convocatoria del Conseyu Asesor de la Llingua asturiana del Conceyu de Xixón, que va celebrase'l viniente miércoles 1 d’ochobre, dempués de más d'un añu ensin convocase. La organización celebra que por fin se ponga en marcha esti órganu que na práctica lleva tola llexislatura ensin actividá.
Yá pue sentise una edición más d'Iniciativa pol Asturianu nes ondes, el programa selmanal dirixíu por Samuel Gradín y emitíu en más d'una docena d'emisores d'Asturies. El programa d'esta selmana inclúi les intervenciones d'alumnos y profesoráu de los IV Cursos d'Asturianu en Xixón y coincide cola apertura del plazu de matrícula pa los V Cursos d'Asturianu en Xixón.
Iniciativa pol Asturianu unviaba va unes selmanes una reclamación al Conceyu de Mieres dempués de recibir una quexa porque esti nun permite l'usu del asturianu nun concursu lliterariu. Díes dempués d’unviar la quexa la conceyala de Consumu, Xuventú ya Infancia púnxose en contactu cola organización pa esplicar la so disposición a facer los cambios necesarios pa que l’asturianu nun seya marxináu nesti concursu.
Nesta nueva edición d'Iniciativa pol Asturianu nes ondes el convidáu ye Paco Granda, periodista percélebre dende cuantayá pol so apueste pol usu del asturianu nos medios de comunicación. Anguaño presenta en TeleAsturias el programa d'alderique deportivu "Asturies ye fútbol" y falamos con él de periodismu n'asturianu nesti programa.
Iniciativa pol Asturianu nes ondes entrevista a Ricardo Chao, de l'asociaciones lleonesa Faceira, pa falar de la so actividá. Les asociaciones en defensa de la nuesa llingua en tol dominiu llingüísticu, Faceira, Furmientu y El Teixu editen conxuntamente el cartelu “La nuesa fauna”, que recueye los nomes de quince de los animales más representativos de Lleón y Zamora.
Va unes selmanes Iniciativa pol Asturianu púnxose en contactu colos responsables de la información metereolóxica de la TPA p'avisar de dellos cambios na toponimia que nun se taben usando nel mapa del tiempu del informativu. Asina, dende va unos meses Bual, y dende va selmanes, L.luarca, cabeces de los conceyos de Bual y Valdés respectivamente, tienen la so denomación oficial namás n'asturianu, quedando derogada l'anterior.
Como ye vezu cada mes, Iniciativa pol Asturianu informa a asociaos y simpatizantes de la entidá de l'actualidá de la llingua asturiana y de l'actividá de la nuesa entidá al traviés del Boletín Informativu dixital que s'apurre al traviés de corréu lletrónicu a miles de persones.
Iniciativa pol Asturianu, en collaboración col Conceyu Universitariu pol Asturianu (CUPA) abre’l plazu p’apuntase a la quinta edición de los Cursos d’Asturianu en Xixón, una esperiencia formativa qu’entama en collaboración cola Academia de la Llingua Asturiana y el Conseyu de Mocedá de Xixón. Los cursos que se van facer una edición más na sede del Conseyu de la Mocedá de Xixón (Avda. Manuel Llaneza, 68), van entamar a partir del 6 d'ochobre, cuntando con 36 hores llectives cada nivel.
Inaciu Galán, presidente d'Iniciativa pol Asturianu tuvo'l pasáu sábadu 16 d’agostu en Cicuiro, aldea de la Tierra de Miranda, el territoriu portugués onde se fala una variedá del asturianu, dientro del Ancontro Blogueiros de l Praino. Xunto a Iniciativa pol Asturianu tuvieron Faceira de Lleón, Furmientu de Zamora, la entidá asturlleonesa El Teixu y l'Associçón de Lhéngua i Cultura Mirandesa.
El xueves 28 celebróse en Litografía Viña, en Cimavilla, Xixón, l'actu d'entrega del II Concursu de Microrrellatos y Micropoemes Musa Cafeína, col que collaboró Iniciativa pol Asturianu. L'actu, presentáu por Ana Lamela, tuvo numberoses referencies a la llingua asturiana, que nesta segunda edición del certame estrenaba la so presencia gracies a la collaboración puesta en marcha ente Musa Cafeína ya Iniciativa pol Asturianu.