Cada mes, nel programa radiofónicu Iniciativa pol Asturianu nes ondes emítese una editorial na que la organización da la opinión sobre cuestiones llingüistiques y reflexona sobre les campañes en marcha, acciones, etc. Reproducimos equí la del mes de xunetu.
Esti sábadu 21 de xunetu la Xunta Direutiva d'Iniciativa pol Asturianu va aconceyar como cada mes pa tratar les cuestiones propies de la organización, facer siguimientu de l'actividá y programar el trabayu.
Yá puede sentise la segunda edición d'Iniciativa pol Asturianu nes ondes, con Xosé B. Álvarez, vocal de rellaciones internacionales de la organización y los músicos Marisa Valle Roso y Pablo Carrera, que falen de la so carrera y del usu del asturianu nel mundu de la música. La presentación y dirección del programa ta al cargu de Samuel Gradín.
Anque entá nun ye una contestación oficial, el 12 de xunu, y coincidiendo con una visita a Uviéu, el director de la Real Academia Española, José Manuel Blecua, contestó na TPA a Iniciativa pol Asturianu con respectu a la petición fecha de camudar la definición d'asturianu nel so diccionariu, onde apaez como "dialecto" en llugar d'idioma.
Iniciativa pol Asturianu quier felicitar a toles empreses que nos caberos meses vienen realizando campañes na llingua propia y destacar la importancia de que n'Asturies el so comerciu emplegue l'asturianu con naturalidá, dalgo que per otra parte tendría que ser habitual como asocede n'otres comunidaes españoles, yá que'l papel de la normalización ye una responsabilidá individual y coleutiva, tanto de les entidaes públiques y privaes.
Yá puede consultase'l boletín informativu dixital d'Iniciativa pol Asturianu #08, que correspuende al mes de xunu y nel que s'apurre a simpatizantes y asociaos información de l'actividá de la organización en tolos ámbitos d'actuación de la mesma. Si tovía nun lu recibes nel to corréu apúntate nesta web y anima otres persones a facelo.
Dempués de seis meses d'actividá pública Iniciativa pol Asturianu sigue medrando en socios y tamién nos amigos que siguen l'actividá de la organización na rede. La páxina en Facebook pasó yá la cifra de los 700 amigos, mientres que na rede Twitter son yá más de 500 los siguidores que lleen cada día los conteníos referíos a Iniciativa pol Asturianu, en total más de 1.200 persones.
Col oxetivu de llegar a cada vegada más asturianos, Iniciativa pol Asturianu suma a una emisora más, Radio L.lena, a la rede de radios qu'emiten el so programa, Iniciativa pol Asturianu nes ondes. Radio L.lena súmase asina a esti proyectu al que yá se sumaren Radio Sele, AllerFM, Radio UJO y la emisora de Bruseles, Radio Alma, que va llevar a los emigrantes asturianos na capital belga, les noticies de la reivindicación llingüística. El programa puede sentise amás na canal d'Ivoox de la organización.
La Romería de la Oficialidá, que se celebró en Martimporra, Bimenes, esti sábadu 16 de xunu, recibió al equipu de voluntariáu d'Iniciativa pol Asturianu de forma mui positiva. A lo llargo de la xornada miembros de la organización atendieron a los interesaos en recibir información nun puestu asitiáu na carpa de la fiesta pel que pasaron cientos de persones. Na xinta popular celebrada nel poliderportivu con más de 300 persones, miembros d'Iniciativa pol Asturianu tuvieron faciendo un repartu de folletos ya informando nes meses sobre'l llabor de la organización.
El programa d'Iniciativa pol Asturianu sigue sumando emisores peles que se radia. Dempués del ésitu de la primer edición del programa, que yá s'emite en Radio Sele, AllerFM y Radio Ujo, agora súmase a esti llistáu Radio Alma, emisora multillingüe de Bruxeles, capital de Bélxica, onde va poder sentise'l programa d'esta organización. Radio Alma, emisora fundada en 1978 pa la emigración presente na ciudá, n'especial de llatinoamérica y el sur d'Europa, emite en tola contorna de Bruxeles al traviés del 101.9 de la FM, amás de pa tol mundu al traviés de la so páxina web. L'asturianu y les noticies sobre la reivindicación llingüística van llegar agora a los miles d'asturianos que viven na capital europea.