 01.04.21.png)
El Ministeriu estudiará la propuesta fecha pola organización de tener la páxina web n’asturianu, como ta nes demás llingües
El presidente d’Iniciativa pol Asturianu, Inaciu Galán, entregó’l pasáu mes de febreru una carta nel llar del Ministeriu d’Educación en Madrid. El Ministru Wert unvia agora una carta a la organización asturiana na que confirma que cola disposición adicional trixésima octava de la cabera versión del antreproyectu de la LOMCE, la conocida como “Llei Wert”, la situación de la llingua asturiana nos centros educativos queda en manes del Gobiernu d’Asturies:
"6. Aquellas Comunidades Autónomas en las que existan lenguas no oficiales que gocen de protección legal las ofertarán, en su caso, en el bloque de asignaturas de libre configuración autonómica, en los términos gue determine su normativa reguladora. "
Iniciativa pol Asturianu vuelve a recordar al Gobiernu d’Asturies la necesidá de siguir avanzando na presencia del asturianu nes escueles ya institutos. La solución ideal vendría cola oficialidá del asturianu y cola correspondiente normativa, pero mientres ye necesario avanzar y que s’introduza l’asturianu como llingua vehicular nes escueles, pelo menos en dalgunes asignatures, asina como facer de l’asignatura d’asturianu, una asignatura xeneral, normal, que compartan tolos alumnos asturianos, y non una asignatura que vive n’absoluta precariedá, como hasta agora.
Páxina web n’asturianu
En cuantes a la solicitú fecha por Iniciativa de que la páxina del Ministeriu d’Eduación use l’asturianu, como usa les llingües oficiales del estáu, el Gabinete del Ministru nun descartó la posibilidá que dexa agora en manes de la Subsecretaría del Ministeriu. Pa Iniciativa pol Asturianu ye importante esti tipu de presencia del idioma, que supón da-y cierta normalidá na aliministración, yá qu’agora la llingua asturiana ta marxinada con respectu al restu de llingües del estáu.
Carta del Ministeriu a Iniciativa pol Asturianu
Carta entregada por Iniciativa pol Asturianu al Ministru d'Educación
