Comparecencia na Xunta Xeneral

Comparecencia d’Inaciu Galán, en representación d’Iniciativa pol Asturianu, na Comisión de Facienda y Fondos Europeos de la Xunta Xeneral d’Asturies el 12 d’avientu del 2024.

Mui bones tardes, búas tardes:

Gracies de mano a esta comisión parllamentaria por dar la oportunidá de participar nesti procesu a Iniciativa pol Asturianu, organización a la que represento güei. Ye siempres un honor poder tar nesta hestórica Xunta Xeneral y apurrir la visión de les persones más esmolecíes pola situación de les llingües d’Asturies. Quiero agradecer a la diputada Tomé la so convidada pa intervenir esta tarde equí.

Os presupostos son a ferramenta máis importante que ten un goberno prá xestión del sou día a día y nel que respecta á cuestión llingüística, núa llingua minorizada, cuntar cos recursos precisos é clave prá recuperación y a medría social da mesma. Toda as llinguas, minorizadas ou non, ten falta de partidas presupostarias públicas prá posta en marcha de políticas lingüísticas, políticass de protección y divulgación. Del mesmo xeito que el patrimonio material, os monumentos, as pezas artísticas, ten falta de cuidaos y divulgación, d’inversióis.

El Goberno d’España dedica importantes partidas presupostarias á promoción, divulgación y investigación da llingua castellana. Taremos toos y toes d’alcuerdu en que’l castellán nun ye una llingua precisamente en peligru de supervivencia, polo que tarán tamién d’alcuerdu en que l’asturianu y l’eonaviegu, que si tán nesi peligru, precisen a lo menos un nivel de sofitu públicu equivalente al d’una llingua con tola protección constitucional y tol impulsu de dellos estaos detrás de la mesma.

Los presupuestos de Política Llingüística que se presenten nesti proyectu son, como siempres asocede coles cuestiones culturales, verdaderamente baxos, si comparamos con otros departamentos y col valir añadíu que-y apurren a Asturies, como elementu identitariu y de cohesión social, les sos llingües. Con too, ha reconocese que siguen la llinia d’ameyoramientu d’estes dos llexislatures caberes.

Precisaríemos de munchu más tiempu pa ser quien a esponer l’analís de toles partíes referíes específicamente a la cuestión de la normalización. Pero en xeneral podemos destacar en positivo’l caltenimientu del presupuestu nes partíes más importantes y la incorporación de personal nel ámbitu educativu, onde tantes cuestiones tán pendientes.

Siguimos considerando un error volver a destinar una partida pa la creación de conteníos n’asturianu en RTPA yá que pensamos qu’esi importe habría salir de los propios presupuestos del Ente. Naide podría imaxinar, camentamos, que la estaya de Deportes de TPA Noticies se financiare al traviés de los presupuestos de la Dirección Xeneral de Deportes. Paeznos que lo más razonable ye que la financiación de los programes n’asturianu de la RTPA salga de los presupuestos de la RTPA, que yá tien esa función ente los sos oxetivos. Nel mes d’abril tuvi nesta mesma sala pa falar del Mandatu Marcu de la RTPA qu’habría marcar les llinies pal usu l’asturianu, y equí tamos, ocho meses más tarde, ensin noticies que nos falen d’avances nesta cuestión.

La partida presupuestaria que más echamos en falta nesti proyectu ye una de 0 euros. Una partida que vien podía llamase de voluntá política y de tresversalidá efectiva. Una partida simbólica pero más útil que cualesquier llinia d’ayudes que puedan poner en marcha,  l’acción decidida nel usu diariu, normalización, con una idea clara: cada acción, cada campaña, cada rotulación, cada iniciativa llexislativa, llinia d’ayudes o política puesta en marcha, ha tener inxerta, la so aportación al procesu de normalización, en toes y caúna de les conseyeríes y muérganos dependientes del Gobiernu d’Asturies.

Tenemos unes llingües propies que tán en seriu peligru de desaniciu, díznoslo la UNESCO, el Conseyu d’Europa… Ye necesario actuar de forma inmediata y ambiciosa. Diéronse pasos nesti usu tresversal. L’aprobación de les Instrucciones relatives a los criterios llingüísticos, el pasáu mes d’abril, supunxo un pasu importante, porque marca una llinia d’actuación tresversal, pero nun se ta faciendo un control activu per parte del propiu Gobiernu y de la conseyería responsable. Ye importante treslladar la necesidá de que les polítiques de normalización, como lo son les d’igualdá o los oxetivos 20-30, nun son cosa namás de Cultura.

Por eso pidimos, non tanto una xuba nos presupuestos, que siempres ye evidentemente positiva, sinón esi tratu tresversal nel usu del asturianu y l’eonaviegu. Fai falta un plan de normalización, nun pue esperar más. Tamién mayor esfuerciu nel usu del idioma per parte de los cargos públicos, diputaes y diputaos, conseyeros y conseyeros, directores xenerales… Nós, dende Iniciativa pol Asturianu ufrimos va tiempu, y siguimos faciéndolo, un cursu d’asturianu gratuitu pa los y les representantes nesta cámara, pa que se suelten a falar n’asturianu, como faen en munchos casos nos ámbitos informales.

Mio güela, falante d’asturianu, va unos años, nun me creyía cuando-y dixi qu’había diputaos qu’usaben l’asturianu nel parllamentu. Ver a persones qu’ella consideraba de nivel intelectual, falando aquella llingua que tanto-y dixeren que yera d’aldeanos, que yera falar mal, foi un impactu. Nun escaezan el so papel social y políticu pa liderar un cambiu de mentalidá y una recuperación de l’autoestima colectiva d’Asturies, que sigue parcialmente pendiente. Faigan un esfuerciu pa que munches güeles, y munchos nietos como yo, sintamos que lo que falamos merez un pequeñu esfuerciu personal que permite da-y voz y presencia n’ámbitos importantes p’Asturies.

Va unos díes festexábemos el Día de la Constitución. Güei nesta cámara volvemos facer un llamáu a toles fuercies polítiques d’Asturies p’axuntar voluntaes y algamar un alcuerdu al rodiu la oficialidá, siguiendo l’espíritu de la Constitución. Los valores de consensu, llibertá, alcuentru y convivencia que va 46 años inspiraron a los ponentes de la Carta Magna son los mesmos que valen pa xenerar un espaciu d’entendimientu y alcuentru pa la dignificación de les llingües propies d’Asturies.

Güei pidimos qu’estos presupuestos seyan los últimos d’una Asturies ensin oficialidá. Anque somos conocedores de les dificultaes, la busca d’un futuru dignu pa les nueses llingües bien podría consiguir el consensu algamáu, por exemplu, pa la reconocencia de la cultura sidrera asturiana. Un ésitu colectivu y tresversal, mui venceyáu a la llingua asturiana, por ser esta una cultura que s’espresa nesti idioma. Axallá podamos celebrar xuntos y xuntes, persones de toles tendencies polítiques democrátiques, que remamos al empar y na mesma dirección na salvaguarda del futuru del asturianu y l’eonaviegu.

Munches gracies. Muitas gracias.