Iniciativa pol Asturianu fai un llamáu a toles fuercies polítiques d’Asturies p’axuntar voluntaes y algamar un alcuerdu alrodiu de la oficialidá siguiendo l’espíritu de la Constitución. La entidá considera que los valores de consensu, llibertá, alcuentru y convivencia que va 46 años inspiraron a los ponentes de la Carta Magna son los mesmos que valen pa xenerar un espaciu d’entendimientu y alcuentru pa la dignificación de les llingües propies d’Asturies.
El presidente de la organización, Iván Llera, recordó amás que “la oficialidá ye la ferramienta llegal que recueye la Constitución Española pa garantizar la igualdá plena de drechos ente tola ciudadanía asturiana; fale la llingua que fale. La oficialidá nun implica que naide tenga que falar obligatoriamente asturianu nin eonaviego, únicamente val pa garantizar los llexítimos y razonables drechos de los falantes. Cada poco tamos denunciando problemes de ciudadanos pa camudar el nome, p’adaptar l’apellíu, pa matriculase na asignatura de Llingua Asturiana, pal usu de la toponimia oficial, etc. Situaciones que nun se daríen si cuntásemos col estatus d’oficialidá pal nuesu idioma nel Estatutu».
Llera apuntó tamién que “la previsión constitucional ye clara, como ta recoyío nel artículu 3.2 de la Carta Magna. Nesti día, aprovechamos pa faer un llamáu a la responsabilidá na defensa d’esos valores constitucionales que garanticen drechos, pero tamién pa avalar cola llexislación na mano’l futuru de les nueses llingües en condiciones d’igualdá respecto al restu d’españoles”.
Iniciativa pol Asturianu, al traviés del so presidente, quixo tamién recordar que “el meyor homenaxe que los partíos políticos pueden faer a la Carta Magna n’Asturies ye aplicar la previsión constitucional pa los idiomes y aprobar nesti añu 2025 la oficialidá”.
