Iniciativa pol Asturianu recuerda a los conceyos la obligación de comunicar al Institutu Nacional d’Estadística (INE) los cambeos na toponimia. L’asociación de reivindicación llingüística contactó colos alcaldes y alcaldeses de los quince conceyos que tovía nun ficieron esti trámite en completando’l procesu de recuperación de los nomes tradicionales de los respectivos llugares y parroquies. Esta situación afecta de manera concreta a los conceyos de Cabrales, Caravia, Castrillón, Eilao, Llanes, Pravia, Ponga, Salas, Samartín d’Ozcos, Santalla d’Ozcos, Somiedu, Teberga, Tapia, Valdés y Villayón.
Nel so escritu a los alcaldes y alcaldeses, el colectivu apunta a que l’ordenamientu xurídicu recueye la responsabilidá de les entidaes llocales de treslladar la toponimia oficial a esti muérganu. Asina lo dispón l’artículu 76 del Real Decretu 1690/1986, qu’afita que los conceyos son los encargaos de comunicar al INE l’actualización de los nomes de los pueblos al traviés d’esti cenciellu trámite alministrativu.
Nesi sen, Iniciativa pol Asturianu señala que l’ausencia d’esti trámite implica que los organismos oficiales que garren como referencia el Nomenclátor del INE (como por exemplu, RTVE o Correos) sigan emplegando formes deturpaes y non les aprobaes en plenu municipal. L’asociación de reivinciación llingüística llamenta que cuntando con esi trabayu fechu y aprobáu quede ensin usu pola falta d’actualización d’estos na base del INE.
La entidá aprovechó la so comunicación a los y les rexidores pa facer un llamáu pa promover l’usu de la toponimia tradicional en diferentes campañes, comunicaciones y actuaciones que se puedan desendolcar dende los conceyos.
