Iniciativa pol Asturianu quier amosar públicamente la so indignación pola desapaición del asturianu de la placa de la estatua d’homenaxe a les Sardineres. El Conceyu de Ribeseya retiró la placa orixinal pa sustituyila por una nueva versión esclusivamente en castellán na que tamién desapaez l’escudu del Principáu d’Asturies. Un pasu atrás na visibilización y usu del idioma cola intención de tapacer y anular la presencia de la llingua asturiana nel conxuntu escultóricu.
La asociación de reivindicación llingüística considera qu’esta actuación ye una falta de respetu escontra la historia, la cultura y la llingua asturiana. La placa orixinal reconocía n’asturianu la memoria d’un colectivu fundamental na vida mariñana y popular de Ribeseya, que yera plenamente falante d’asturianu. El gobiernu del conceyu, del Partíu Popular, decidió por contra borrar esa presencia del idioma propiu del espaciu públicu. L’usu del asturianu nun xeneraba nengún tipu de problemática o conflictu.
Iniciativa pol Asturianu critica que “nun ye de recibu que nuna escultura que tien el nome n’asturianu, a mou d’homenaxe a unes muyeres que se dedicaben a tarees del mar onde la llingua asturiana taba presente nel so llabor y nos nomes de los pexes, se suprima por una orde municipal gastando más recursos pa ello”.
La organización reclama al Partíu Popular d’Asturies aclarar la so postura respeuto al patrimoniu llingüísticu. Resulta incomprensible tar presumiendo de siguío de l’autoría de la Llei d’Usu y depués tomar esti tipu de decisiones nos conceyos onde gobiernen. Midíes que van escontra la presencia del idioma y que vulneren sistemáticamente la propia llexislación en materia toponímica y llingüística.
Iniciativa pol Asturianu reclama al Conceyu de Ribeseya que rectifique inmediatamente, recupere la placa orixinal y abandone una política de depresciu al nuesu patrimoniu llingüísticu.
