Iniciativa pol Asturianu reclama a los partíos políticos con representación na Xunta Xeneral la reactivación de la comisión qu’ellabora’l mandatu-marcu de la Radio Televisión del Principáu d’Asturies (RTPA). Coincidiendo cola conmemoración del Día Mundial de la Televisión, l’asociación de reivindicación llingüística fizo llegar a los grupos parllamentarios un documentu con propuestes de calter llingüísticu a incorporar al mandatu-marcu. El documentu, que tien una vixencia de nueve años, fixa los oxetivos xenerales que debe perseguir el serviciu públicu de comunicación audiovisual durante esi periodu.
El documentu incorpora midíes pa la radio, la televisión y los medios dixitales, amás del ámbitu corporativu. L’asociación considera imprescindible que’l mandatu-marcu recueya la obligación de la RTPA de normalizar les llingües propies. Tamién se proponen otres midíes como que la empresa de capital públicu tenga’l nome corporativu n’asturianu y eonaviego y adaptar el manual d’identida corporativa a les llingües propies. Otru puntu que recueye l’escritu ye la creación d’una dirección encargada de la planificación de los conteníos n’asturianu y eonaviego y vele pola calidá llingüística de los mesmos. D’igual manera, la entidá ve prioritario afitar l’usu preferente de la toponimia tradicional tanto de forma oral como per escrito.
Iniciativa pol Asturianu apuesta por una medra significativa de la presencia de les llingües propies na primer canal de TPA hasta un porcentaxe nunca inferior al 30% de la programación nos primeros años y del 50% al final de periodu d’aplicación del mandatu-marcu. Esta presencia ha ser continuada y tresversal. Por esti motivu, la organización de reivindicación llingüística considera insuficiente la emisión d’un resume informativu de llunes a vienres de dos minutos. Los informativos son unu de los pegoyos de la televisión autonómica y de la misión de serviciu públicu. Por ello se propón la emisión diaria d’un noticieru nes llingües propies.
Respecto a la radio, Iniciativa pol Asturianu propón convertir la RPA nuna emisora 100% n’asturianu y eonaviego y que se visibilice la música nestes llingües con un porcentaxe del 50% del total.
Toes estes propuestes pa trabayar l’ámbitu llingüísticu ampárense en diferentes tipos de llexislación dende la europea (como la Carta Europea de les Llingües) y l’asturiana como l’Estatutu d’Autonomía, la Llei d’Usu y Promoción del Asturianu, la Llei de creación de la RTPA y la de segunda reestructuración del sector público autonómicu.
