Iniciativa pol Asturianu presentó esti martes ante’l Conseyu d’Europa un informe sobre la situación de la llingua asturiana dientro del ámbito educativu, alministrativu y llegal qu’afonda na protección cola qu’angüaño cuenta la llingua asturiana. El vocal de la xunta directiva Inaciu Galán foi l’encargáu d’aconceyar de forma telemática col Comité Independiente de la Carta Europea de les Llingües Rexonales o Minorizaes del Conseyu d’Europa, comisión encabezada por Maxime Huot, alministrador y secretariu de la División de Minoríes Nacionales y Llingües Minoritaries del Conseyu d’Europa.
España presentó’l so sestu informe periódicu sobre la implementación de la Carta Europea de les Llingües Rexonales o Minoritaries del Conseyu d’Europa el 3 d’agostu de 2023. El Comité independiente d’espertos (COMEX) sobre la Carta de les Llingües ta evaluando nestos díes l’informe presentáu.
El directivu de la entidá de reivindicación llingüística desplicó la situación sociolingüística del idioma, faciendo un repás hestóricu y ubicando los territorios onde la llingua asturiana ta presente; tamién de la situación en Llión y los demás territorios españoles onde se fala asturianu.
Na so intervención, Galán esplicó les dificultaes a les que s’enfrenta l’idioma nel sistema educativu y punxo como exemplu la complicada presencia de la llingua propia na etapa infantil que depende de la voluntá del centru educativu, aspectu que choca colo que recueye la Carta Europea de les Llingües nel so artículu 8. La reglamentación llegal asturiana actual nun tien prevista la presencia del asturianu nesta etapa tan importante pa la tresmisión del idioma. La presencia del asturianu nesti ciclu ye anecdótica y mui probe n’hores. En primaria l’asignatura ye voluntaria y non optativa. Na secundaria, l’asturianu compite con otres materies, como la llingua francesa, provocando una caída de la matrícula na asignatura.
Galán valoró’l Plan Piloto d’usu del asturianu como llingua vehicular, que se desarrolló en seis escueles d’Educación Primaria. Una esperiencia que foi satisfactoria pa los escolinos, les families y el profesoráu de los centros que participaron de forma voluntaria con costu cero.
Respecto a los medios de comunicación, Galán señaló l’incumplimientu del artículu 11 de la Carta Europea de les Llingües que recueye’l compromisu de les alministraciones a “garantizar la creación de, al menos, una emisora de radio y una canal de televisión nes llingües rexonales o minoritaries”. Angüaño, la presencia del asturianu na Radiotelevisión del Principáu d’Asturies ye escasa y inesistente nel casu del eonaviego. Tampoco esiste presencia de nenguna de les dos llingues propies nel serviciu públicu de comunicación de titularidá estatal.
El representante de la organización de reivindicación llingüística faló tamién del procesu de recuperación toponímica qu’entamó nel añu 2004 y que dos décades depués tovía nun remató en cuatro conceyos. Onde sí finalizó esa xera fízose amestando en munchos casos la forma deturpada a la tradicional, faciendo amás un usu irregular de los mesmos.
Na so intervención, Galán tamién rescampló’l ningunéu del Gobiernu central a l’Academia de la Llingua Asturiana (ALLA) foi históricamente escaecida pol Gobiernu d’España. Demientres que’l restu d’academies de llingües d’España recibíen grandes partíes -sobre 200.000 euros- con cargu a los Presupuestos Xenerales del Estáu, la institución asturiana nun recibía aportación estatal hasta va cuatro años. Inda asina, la partida ye mui inferior al de les academies de les demás llingües españoles.
La comisión qu’encabezó Huot interesóse pol plan pilotu y la presencia del asturianu nes diferentes etapes educatives y cuestionó sobre qué medides resultaríen clave pa salvaguardar la llingua asturiana. Galán consideró que resultaría fundamental cuntar con una presencia digna y potente de la llingua asturiana nel ámbitu educativu. Tamién defendió multiplicar la presencia de la llingua propia nos espacios d’ociu y nes redes sociales y que l’idioma tea presente nes nueves tecnoloxíes y na intelixencia artificial.
Pa rematar l’acuentru, el vocal d’Iniciativa pol Asturianu denunció que falten midíes concretes como la ellaboriación d’un Plan de Normalización Llingüística a nivel autonómicu pa organizar y evaluar el trabayu nesta materia.
