Les ‘lletrones’ nueves de Ḷḷuarca incumplen la toponimia oficial de la capital del conceyu de Valdés. El conxuntu escultóricu instaláu nel entamu d’esti añu 2024 solo cuenta cola versión deturpada, en contraposición colo que recueye’l Decretu 30/2021, de 11 de xunu, de primer modificación del Decretu 77/2014, de 5 d’agostu, pol que se determinen los topónimos oficiales del conceyu de Valdés relativu a la capital que ye Luarca/Ḷḷuarca.
Iniciativa pol Asturianu llamenta’l pocu procuru pol usu del nome tradicional de la capital valdesana nun conceyu gobernáu pol PSOE, partíu que lleva nel so programa la oficialidá de la llingua asturiana. Dase la circunstancia de que’l Conceyu de Valdés aprobó nel exerciciu 2021 un cambiu nel so decretu de toponomia pa incluyir, de manera oficial, la doble denominación del so topónomu capitalín resultando Luarca/Ḷḷuarca la forma oficial como recueye’l decretu citáu anteriormente. Depués d’aprobar esti cambéu pa cuntar cola doble denominación, el Conceyu de Valdés únicamente utiliza la forma deturpada.
La organización recuerda’l deber del cumplimientu de la toponimia oficial tal como recueye la Llei d’Usu nel so artículu V, puntu 1, “los topónimos de la Comunidá Autónoma del Principáu d’Asturies van tener la denominación oficial na so forma tradicional. Cuando un topónimu tenga usu xeneralizáu na so forma tradicional y en castellán, la denominación va poder ser billingüe”. Iniciativa pol Asturianu solicita la instalación d’un conxuntu escultóricu col topónimu tradicional de Ḷḷuarca o la adaptación del esistente pa que tea presente la doble denominación de la villa blanca.
