Intervención d’Arantza Margolles, vocal de comunicación d’Iniciativa pol Asturianu, na rueda de prensa sobre la presentación de la proposición sobre’l cambéu de denominación d el cai L’Argandona por cai Xosefa Xovellanos.
Nel añu 2022, un estudiu asitió a Xixón como la ciudá d’España con un mayor porcentaxe de les sos cais dedicáu a muyeres. La victoria, sicasí, yera pírrica: llevamos esi honor con solo un 19,2% del callexeru con nome de muyer y a pesar de que de la otra parte xuégase con trampes. Con cromos repes. Vaya: que de tolos homes que tenemos nel nuesu callexeru, hai hasta dalgún que se bilocó. Ye’l casu de les cais Fernando Morán Llavandera y Santa Doradía, dedicaes, como recuerda’l cronista oficial de la villa, Luis Miguel Piñera, na so monumental obra Las calles de Gijón. Historia de sus nombres, a una mesma persona: Fernando Morán Llavandera, abad de Santa Doradía, quien collaboró con Gaspar Melchor de Xovellanos y fundó una escuela col nome d’esta advocación pa formar nes primeres lletres a los neños probes.
Esta anomalía nun foi iguada dende la duplicación d’estes cais en 1932, como tampoco lo foi en 1990 – cuando la cai La Argandona recuperó’l nome que yá tenía enantes de la Guerra Civil- el fechu de qu’esta fuera nomada col nomatu del home, y non col nome propiu de la muyer homenaxada, doña Xosefa de Xovellanos.
Va poder quiciabes dicise dende ciertos sectores que lleven la negación por bandera y de cuyos nomes, que diría’l mancu de Lepanto, nun queremos alcordanos, que la estrañeza que munches persones manifestamos ante esti fechu parte d’una enésima vuelta de tuerca a un presuntu feminismu tresnocháu. Y la verdá ye que namás lloñe de la realidá. Porque esta circunstancia yá-y resultaba curiosa a Calisto de Rato y Roces, cuando dexó escritu que “hebo quien bautizó una cai de Xixón (ensin cases y nes contornes) col nome de La Argandona, que quier dicir de doña Josefa Jove Llanos y Jove Ramírez, vilba de don Domingo González Argandona, abogáu”. Yera tamién l’añu 1932, y el testu foi publicáu nel boletín mensual de la Unión Local de Mocedaes Católiques.
Eso sí: escaecía naquella ocasión el bonu de don Calisto el papel como poeta de Josefa de Xovellanos, una faceta que fora reivindicada cuasi un sieglu enantes por Xosé Caveda y Nava, fíu, por cierto, d’otru ilustráu asturianu, anque esti maliayu. Cola publicación de Colección de poesías en dialectu asturianu, en 1839 (yá llovió) pudimos afayanos a la primera muyer de la que se tenga constancia qu’escribió n’asturianu; de la que se tenga constancia, sí, porque asina, con duldes, hai que dicilo. Asina, con duldes, ye como se tien de narrar la Hestoria.
Y dicir: que se tenga constancia, que se sepa, que sepamos, porque seique los versos de Xosefa Xovellanos solo pudieron salir de los caxones de la so mesina, onde la sociedá del so tiempu imponía que s’escondieren los sentimientos y l’alma de les muyeres, por pura casualidá; y non asina los de tantes otres, callaes siempres detrás del nome d’un home; del venceyamientu con un hermanu; de la infantilización d’una sociedá que siempres, y especialmente nos sieglos nos que vivió Xosefa, quíxonos ser ánxeles del hogar. Ignorantes, sumises, ensin voz, callaes porque paecemos como ausentes, ensin opinión; dacuando, yá lo ven, tamién ensin nome propiu, nin oficiu, nin más beneficiu qu’aquel que mos venceya a unu o a otru varón.
Xixón débe-y munches coses a doña Xosefa de Xovellanos. Asturies entera débe-y munches coses, porque nun podemos escaecer que la so obra tamién tresciende les nueses fronteres. Ella mesma vivió n’Uviéu y narró les desigualdaes sociales qu’ellí esistíen: cuantu ven los mios güeyos ye’spantible. Debémos-y toes una reconocencia. Pola so obra lliteraria, pola so obra solidaria, pola so obra social; pol so papel enxamás reivindicáu como cronista del so tiempu. Ye’spantible, que diría Xosefa, que, debiéndo-y tantes coses, sigamos en plenu 2024 pidiendo que la cai que la homenaxea, a cencielles, lleve’l so nome. El so nome, el d’ella, el mesmu, non el d’otra persona, por munchu que s’amaren nel curtiu tiempu del que tuvieron doña Xosefa de Xovellanos y don Domingo González de Argandona.
En Xixón abunden les muyeres de raza, pero escaseen los sos nomes nes plaques del nuesu callexeru. Fáltanos, por casu, una dedicada a María de Santo Tomé, fundadora del Conventu de Agustines Recoletes, y a tantes otres. Somos llíderes nacionales en cais de muyer, sí, pero faise fartu difícil pensar con qué cara poder siguir reivindicando a les qu’inda nun les tienen, entá mereciéndolo, cuando a la pionera de les lletres asturianes; recordada y estudiada yá dende va dos sieglos, se-y sustrae, por ser esta vegada nome de muyer, el nobilísimo honor de llamase, con nome propiu, col d’ella, doña Xosefa de Xovellanos y de Xove-Ramírez.
