La concesión del Premiu Nacional de les Músiques del Ministeriu de Cultura a Rodrigo Cuevas foi la Meyor Noticia pal asturianu de 2023. Asina lo decidieron de forma mayoritaria les persones que participaron na votación qu’entama añalmente Iniciativa pol Asturianu. La ciudadanía valora’l recocimientu del Gobiernu d’España al músicu asturianu y l’usu del idioma dientro de les sos composiciones musicales.
La segunda noticia que más sofitos algamó foi l’usu de la toponimia asturiana nos nuevos indicadores del tercer carril de l’autopista ‘Y’. Ye la primer vez que la Demarcación de Carreteres del Estáu emplega la toponimia oficial na señalización de les carreteres de titularidá estatal. En tercer llugar, quedó la incorporación d’un resume con información n’asturianu na segunda edición de TPA Noticies. Anque angüaño ye probe, ésti ye un primer pasu pa una más potente presencia de la llingua asturiana nos medios públicos fundamental pa la so normalización.
Ente les opciones más votaes figuren tamién el compromisu del Institutu Cervantes pa poner en marcha cursos pal deprendizaxe de llingua asturiana nos distintos centros que tien abierto alredor del mundu y l’anunciu d’un decretu nuevu de toponimia que va permitir oficializar los nomes xeográficos. Les persones participantes tamién destacaron como una de les noticies más importantes del añu’l reconocimientu del Gobiernu asturianu al doctor en Filoloxía Románica pola Universidá d’Uviéu y primer presidente de l’Academia de la Llingua Asturiana (ALLA), Xosé Lluis García Arias, que recibió en setiembre la medaya d’Asturies.
Iniciativa pol Asturianu fixo públicu esti miércoles el resultáu de la votación popular, que nesta edición que volvió a ser un ésitu en participación per parte de la ciudadanía. La organización de reivindicación llingüística agradez la colaboración y participación a toles persones que participaron na escoyeta popular que cumplió once años de recoyer bones noticies.
